Польшанинг Академик алмашинув миллий агентлиги ўзбекистонлик талабалар учун ҳар йили грантлар ва стипендиялар тақдим этиши кутилмоқда

Ўзбекистон элчиси Алишер Агзамхўжаев Польша ташқи ишлар вазирининг маслаҳатчиси Магдалена Полак-Золадкевич ва Ҳамкорликни ривожлантириш департаменти директори Магдалена Сидорович билан учрашув ўтказди. Бу ҳақда “Дунё” АА хабар берди.

Мулоқот давомида икки мамлакат ўртасидаги алоқаларни барча соҳаларда янада жадаллаштириш, Польшадан Ўзбекистонга грант ва молиявий-техник кўмак жалб қилиш имкониятлари муҳокама қилинди.

Польша вакиллари ўзбекистонлик талабалар учун ҳар йили Академик алмашинув миллий агентлигининг (NАWА) грантлари ва стипендиялари тақдим этилишини маълум қилди.

Шунингдек, Польша ТИВ Ҳамкорликни ривожлантириш департаменти ва Лех Качинский номидаги Давлат бошқаруви миллий мактабининг (КSAP) “Шарқий ҳамкорлик давлат бошқаруви академияси” (AAPPW) дастури орқали Ўзбекистон давлат идоралари ходимлари учун икки ҳафталик махсус малака ошириш тренинглари ташкил этиш мумкинлиги қайд этилди.

Бундан ташқари, Польша Стратегик захиралар давлат агентлиги, Lane Kirkland стипендия дастури, EURLО дастури, Adamed компанияси ва бошқа жамғармалар орқали Ўзбекистонга Польшадан грант ва молиявий-техник кўмакни икки баробарга ошириш бўйича келишувга эришилди.