Сингапур президенти Ҳалима Яқуб бошчилигидаги делегация Ўзбекистон президенти ҳузуридаги Давлат бошқаруви академиясига ташриф буюрди, деб хабар беради ЎзА.
Қайд этилишича, ташриф давомида Давлат бошқаруви академияси профессор-ўқитувчилари, бир гуруҳ иқтидорли ёшлар иштирокида давра суҳбати ташкил қилинган. Шу билан бирга, Ўзбекистон—Сингапур қўшма таълим марказининг тантанали очилиш маросими бўлиб ўтган.
Марказ кадрлар захирасига киритилган давлат хизматчиларимизнинг Давлат хизмати коллежи, Ли Куан Ю номидаги давлат бошқаруви мактаби каби Сингапурнинг нуфузли таълим муассасаларида малака оширишини ташкил қилиш билан шуғулланади.
Бундан ташқари, таълим марказида замонавий жиҳозланган коворкинг майдони ташкил қилиниб, бу ерда сингапурлик экспертлар жалб қилинган ҳолда устувор лойиҳаларни амалга ошириш бўйича ҳамкорлик олиб борилади.
Шавкат Мирзиёевнинг таклифига биноан Сингапур президенти Ҳалима Яқуб 23 май куни давлат ташрифи билан Ўзбекистонга келганди. Олий мартабали меҳмон ва Сингапур делегацияси аъзолари “Янги Ўзбекистон” боғига ташриф буюриб, Мустақиллик монументи пойига гул қўйди, Ўзбекистоннинг истиқлол йилларидаги ривожланиши ва ушбу бетакрор мажмуанинг яратилиш тарихи билан танишди, миллий маданий марказлар вакиллари билан учрашди.
24 май куни Шавкат Мирзиёев ва Сингапур президенти ҳузурида икки томонлама ҳужжатларни алмашиш маросими бўлиб ўтди.
Изоҳ (0)