Ўзбекистон президенти Шавкат Мирзиёев ва Германия канцлери Олаф Шольц 16 сентябрь куни қўшма Бошқарув кадрларини тайёрлаш мактабини ишга тушириш маросимида иштирок этди.
-W6eQMZlx.jpg)
Президент матбуот хизматининг маълум қилишича, лойиҳа Ўзбекистон президенти ҳузуридаги давлат бошқаруви академияси ва Давлат хизматини ривожлантириш агентлиги томонидан Ханнс Зайдел жамғармаси ҳамда Бавария давлат бошқаруви мактаби билан ҳамкорликда амалга оширилди.
Мутасаддилар видеоалоқа орқали етакчиларга лойиҳа ҳақида батафсил маълумот берди. Унинг асосий мақсад ва вазифалари Ўзбекистон ҳудудларида бошқарув кадрларининг ижтимоий-иқтисодий ривожланиш, хорижий инвестицияларни жалб этиш ва илғор технологияларни ўзлаштириш борасидаги салоҳиятини оширишдан иборат.
Германия канцлери Олаф Шольц Шавкат Мирзиёевнинг таклифига биноан 15 сентябрь куни Самарқандга келганди. Ташриф давомида олий даражадаги музокаралар ўтказилди. Унда Ўзбекистон—Германия кўп қиррали ҳамкорлигини янада ривожлантириш масалалари кўриб чиқилди.
Музокаралар якунида Шавкат Мирзиёев ва Германия канцлери Олаф Шольц Қўшма декларацияни қабул қилди, 8 та икки томонлама ҳужжат имзоланди. Бундан ташқари, 2024—2026 йилларга мўлжалланган Технологик шериклик ва саноат кооперацияси дастури қабул қилинди, шунингдек, Ўзбекистон ва Германиянинг етакчи корхоналари даражасида бир қатор битим ва шартномалар тузилди.
Изоҳ (0)