Даврон Ҳидоятов “Ўзавтосаноат” бошқарув раиси ўринбосари этиб тайинланди  

Чирчиқ шаҳрининг собиқ ҳокими Даврон Ҳидоятов “Ўзавтосаноат” бошқаруви раиси ўринбосари лавозимига тайинланди. Бу ҳақда “Дарё” манбаси хабар берди.

13 март куни Тошкент вилоятининг Чирчиқ шаҳри ҳокими Даврон Ҳидоятов лавозимидан кетгани тўғрисида хабар берилганди. Унинг ўрнига Вазирлар Маҳкамасида масъул вазифада ишлаб келган Муроджон Абдураҳимов тайинланган эди.

Даврон Ҳидоятов 1976 йилда туғилган, Тошкент давлат иқтисодиёт университети ва Ўзбекистон банк-молия академияси битирувчиси. 1996–2004 йилларда Ўзбекистон Марказий банки тизимида, 2004–2005 йилларда “Осиё-Инвест Банк” (Москва) бошқаруви раиси лавозимида, 2005–2009 йилларда Ўзбекистон Марказий банки тизимида ишлаган.

2009 йилдан 2012 йилгача GM Узбекистан компаниясининг молия бўйича ижрочи директори, 2012 йилдан 2014 йилгача MAN Auto-Uzbekistan ҚК бош директори лавозимларида фаолият юритган. У президентнинг 2021 йил 30 январдаги фармони билан лавозимидан озод этилган Тошкент вилояти ҳокими Рустам Холматовнинг ўрнига вилоят ҳокими вазифасини бажарувчи этиб тайинланган эди. 

Ўша йили ноябрь ойида эса вилоят ҳокимлигидан олиниб, Чирчиқ шаҳри ҳокими сифатида иш бошлаганди. Даврон Ҳидоятов ўрнига Тошкент вилояти ҳокими вазифасини бажарувчи этиб Қашқадарёнинг собиқ ҳокими Зоир Мирзаев тайинланганди.