Асрлар давомида қироллик хонадони аъзолари фарзандларини қаттиққўллик билан тарбиялаган ва уларнинг ҳар бири бола тарбиясида қироллик протоколига риоя қилиш қанчалик қийинлигини билади. Бироқ кўпчилик анъаналар ва оналик инстинктларига риоя қилиш ўртасидаги мувозанатни топиб, ўз авлодларига бахтли болаликни беролди.
Малика Диана
Кўп асрлар давомида аристократик доираларда энагалар одатий ҳол ҳисобланган ва улар қироллик меросхўрларини тарбиялашда иштирок этган, шу билан бирга боланинг шахсий эҳтиёжларига эътибор бермаслик одат тусига кирган. Яхши она ўғилларини ҳукмдор бўлишга ўргатиши ва қизларини идеал келин қилиб тарбиялаши керак, деб ишонилган. Аммо буларнинг барчаси малика Дианага умуман қизиқ эмасди.
Турмушга чиқишидан олдин Ди хоним болалар боғчасида ишлаган. У ҳамма нарсадан кўра ўғилларига бахтли болаликни беришни хоҳларди. Уэлс маликаси Уильям ва Гаррига завқ берувчи ҳар қандай кўнгилочар ўйинларга рухсат беради. Кичкина шаҳзодалар билан яширинча кино ва паркларга бориб, қироллик одатларини бузади.
Бир куни Уэлс маликаси “Оналар пойгаси”да қатнашади, бошқа оналар билан рақобатлашишдан уялмайди. Умуман олганда, унинг кундалик тартиби ўғилларига имкон қадар оддий болаликни беришдан иборат эди. Дугонаси Лана Маркс шундай дейди: “У болалари мактабдан қайтганда ҳамма нарсани ташларди. Унинг учун бирон бир давлат раҳбари билан учрашув ёки тантанали тадбирда иштирок этиш муҳим эмасди — булар у учун иккинчи даражали эди”.
Малика Кейт
Шаҳзода Жорж туғилгандан сўнг, Кейт Британия тахтининг бўлажак меросхўрини бегона кўзлардан узоққа — ота-онасининг Беркширдаги уйига олиб кетади. Бугунги кунда ХIX асрнинг бошида қурилган Норфолкдаги Анмер Ҳолл мулкида унинг уч фарзанди учун ажойиб макон яратилган. Бу ер Шарлотта, Жорж ва Луи учун ҳайвонот боғи, ажойиб табиий тарих музейи ва ҳатто улар янги кийим учун бориши мумкин бўлган оддий супермаркетларни ўз ичига олади.
Кембриж ворисларини тарбиялашда меҳр-оқибат, одамларга ҳурмат ва огоҳлик ҳамма нарсадан устун туради. “Менимча, бу нарсалар математика ёки спорт каби муҳим”, — дейди малика Кейт. Перфексионизмни рад этиб, у оддий ҳаётнинг кичик завқларига эътибор қаратади. Кетрин болаларининг туғилган куни арафасида пиёда юриш, бирга пицца пишириш, футбол томоша қилиш ва туғилган кун тортини тайёрлашни ўз ичига олган оилавий одатларни яхши кўради.
Княгиня Шарлин
Княгиня Шарлин турмуш ўртоғи Алберт билан фарзандлари — малика Габриэлла ва шаҳзода Жакни шаҳар ташқарисидаги қасрда, табиат қуршовида тарбиялайди. Шарлин Зимбабведа туғилган ва табиатга яқин бўлишга ўрганиб қолган, шунинг учун у болалари уй ҳайвонлари билан ётоқларида ухлаб қолишларига қарши эмас. “Болалар ким мен билан ухлаши ҳақида жанжал қилишади — дейди у. — Улар бизнинг каравотимизда ётишни яхши кўради”.
Малика Виктория
Швеция валиаҳд маликаси фарзандларига уларни севишларини кўрсатиш орқали уларга ишонч беради. Виктория ва эри Даниэлнинг фарзандлари ота-оналари билан кўп вақт ўтказади: улар болалари билан бирга овқат пиширади, уй вазифаларини бажаришда уларга ёрдам беради ва оддий она-ота қилиши керак бўлган ҳамма нарсани қилишади. Маликанинг фикрича, Эстелле ва Оскар швед фуқаролари каби оддий болаликни ўтказиши керак.
Қиролича Елизавета II
Елизавета II тахтга 25 ёшида ўтиради ва катта фарзандлари шаҳзода Чарльз ва малика Анна билан кўп вақт ўтказа олмайди. Афсуски, бу унинг уч ўғли ва қизи ўртасидаги муносабатларга қисман таъсир қилади. Бироқ уларнинг ҳар бири бахтли болаликни ўтказади. Айниқса, байрам кунлари қиролича, эри ва болалари учун бахтли дамларга айланади.
Виндзор оиласи архивларида қиролича ва шаҳзода Филипп Balmoral қасридаги майсазорда фарзандлари билан ўйнаётган тасвирлар мавжуд. Фотолардан бирида малика Анна пляждаги қумга бўйнига қадар кўмилганини кўриш мумкин. Бошқасида монархнинг болалари велосипедда суратга тушган — шаҳзода Филипп уларга қироллик яхтаси Brittania’даги кема тепалигидан пастга тушишга ёрдам беради. Қироличанинг жияни Сара Чатто хоним: “Биз дунё шовқин-суронларидан шунчалик узоқда эдикки, бу ҳақиқатан ҳам ажойиб дамлар эди”, — деб эслайди.
Изоҳ (0)