“Араб оламининг Дианаси”: Саудия Арабистони аёллари ҳақидаги стереотипларни ўзгартириб юборган малика Амира ат-Тавил ҳақида

Дунё ОАВ Европа монархлари, хусусан, Меган Маркл ва Кейт Миддлтон сингари маликаларнинг айтган гапидан тортиб, кийиниш услубигача муҳокама қилишдан чарчамайди. Аммо гўзаллиги ва юксак дидга эга эканлиги билан эътирофга лойиқ маликалар фақатгина Ғарбда бўлмайди. Араб аёллари, уларнинг кийиниши, турмуш тарзи билан боғлиқ тасаввурларни ўзгаришига сабаб бўладиган Амира ат-Тавил ҳақида маълумот берамиз.

Амира оддий оилада туғилган ва бир куни одамлар уни малика дейишларини тасаввур ҳам қила олмасди. Талабалик даврида Саудия Арабистони қиролининг жияни билан учрашгач, унинг ҳаёти буткул ўзгариб кетади. Қиз ўқишдан берилган топшириқ — шаҳзода Валид ибн Талолдан интервью олиши керак бўлган. Ўшанда Амира бор-йўғи 18 ёшда, тахт вориси эса 46 ёшда эди. Гўзал талаба биринчи учрашувданоқ Саудия шаҳзодасининг қалбини забт этади ва 9 ойлик муносабатлардан сўнг улар турмуш қуришади.

Амира жамоат жойларида араб миллий либоси — абайя кийишдан воз кечган Саудия Арабистонидаги биринчи малика бўлган. Европача услубда кийинишни яхши кўрадиган малика мамлакатдаги аёллардан биринчилардан бўлиб ҳайдовчилик гувоҳномасини олиб, автомобиль ҳайдаган. Қолаверса, у аёлларга машина ҳайдаш ҳуқуқини бериш кераклиги бўйича бир неча марта чиқиш қилган.

Камбағаллик, ишсизлик, шунингдек, Яқин Шарқдаги аёллар ҳуқуқларини ҳимоя қилиш бўйича бир қанча хайрия лойиҳаларида фаол иштирок этган Амира арабларнинг “малика Дианаси” деб ҳам аталади.

Шаҳзоданинг қариндошлари эркин турмуш тарзи сабаб уни ёқтирмайди. Турмуш қурганига 10 йилдан кўп вақт ўтса ҳам меросхўр дунёга келтирмагани қироллик оиласи вакилларининг норозилигини янада орттирган. 

ОАВда Амира бепуштлиги, шаҳзоданинг бундан хабари борлиги ва ҳатто никоҳ шартномасида мазкур пункт қайд қилингани ёзилган.

Бошқа миш-мишларда эса маликанинг ўзи она бўлишни хоҳламаслиги айтилади.

2013 йилда жуфтликнинг муносабатларига нуқта қўйилган. Ажрашиш жараёни тинч якунига етган, Амира ва шаҳзода дўстлигини сақлаб қолган.

Бироқ ҳозирда ҳам қироллик оиласининг расмий аъзоси эмаслигига қарамай, одамлар уни малика деб аташда давом этади.

Ҳатто турмуш ўртоғи билан ажрашганидан кейин ҳам хайрия фаолияти билан шуғулланишда давом этган собиқ малика миллионлаб Шарқ аёллари учун ўрнак бўла олади. 2018 йилда собиқ малика миллиардер Халифа ибн Бутти ал-Муҳайрига турмушга чиқди.

Кўпчилик уни “Аловуддиннинг сеҳрли чироғи” мультфильмидаги малика Жасминга ўхшатади.

У нафақат ташқи кўриниши билан, балки ички оламининг ўзига хослиги билан ҳам эртак қаҳрамонини эсга солади.