Никоҳ тўйида келинларнинг қандай либос кийиши ҳақида махсус қоида йўқ. Ҳар бир қиз ўз хоҳишига кўра либос танлайди. Қуйида дунёнинг турли бурчакларидаги миллат ва урф-одатга кўра танланган келинлик либослари билан танишасиз.
Ливан
Ливанлик келинлар шлейфи узун ва оғирлиги бўйича рекордни янгилайдиган либосларни танлашни хуш кўрса керак. Либос қимматбаҳо тошлар, юбка қисми кенг ҳажмда, қўл меҳнати билан нақшланган корсет, марварид ва олмос тақинчоқлар билан бойитилади. Бу ливанлик келинларни бошқалардан ажратиб турадиган асосий белгилардир.
Туркия
Туркиялик келинлар ҳам ливанликлардан қолишмайди. Ушбу мамлакатда ҳам тўйлар кенг миқёсда нишонланади. Қизлар тўй учун маликалар либосини танлайди. Шунингдек, турк келинлари чиройли соч турмаги, заргарлик буюмлари, алоҳида урғу берадиган пардозга аҳамият қаратади. Уларнинг аксарияти бундай бахтли кунини қизил рангли либосда ҳам кутиб олишни яхши кўради.
Ҳиндистон
Ҳиндистоннинг тўйлари ҳақиқий байрамга айланиб кетади. Олтин ип, кашта, қимматбаҳо тошлар, марварид, келинларнинг ёрқин рангли сариси. Бундан ташқари, келинларнинг хиналари ҳам бошқа давлат келинларида учрамайди. Тақинчоқлар бурундан тортиб оёққача тақилади. Ҳиндистонлик келинлар бошқалардан ажралиб туриши учун жуда кўп ҳаракат қилиши керак. Шунингдек, ҳинд куёвлари ҳам бу борада келинлардан қолишмайди.
Швеция
Швециялик келинлар дабдабага интилмайди. Уларга оддий, кўзга ташланмайдиган ва қулай оппоқ либос бўлса бас. Келинлар шу либосида ҳам кўчада бемалол юриб кетаверади. Швеция тўйлари жуда кичик ва камтарона тарзда нишонланади. Тўйга ташриф буюрганлар совға улашмайди, шунчаки келин ва куёвга яхши тилаклар билдиради.
Япония
Япониялик келинлар тўй давомида уч маротаба келинлик либосини ўзгартиради. Биринчиси, гуллар, марварид ва тилла кашталар билан безатилган оқ кимоно. Иккинчиси, ҳар хил рангли кимоно, учинчиси эса Европа услубидаги тўй либоси.
Нигерия
Нигерияда келин ва куёв бир хил рангда либос кияди. Албатта, шунда ҳам келиннинг либоси мураккаб дизайнга эга. Келин тўй куни камида икки маротаба либосини ўзгартириши керак. Агар унинг либослари чиройли ва ҳаммани ҳайратда қолдиргудек бўлса, тўй шунча муваффақиятли ҳисобланади.
Франция
Француз аёллари келинлик либосининг нафисини афзал деб билади. Улар жуда ҳам мураккаб бўлмаган кўринишдаги либосни танлайди. Шунингдек, ҳашамдор соч турмагидан ҳам қочади. Пардозни ҳам ортиқча бўрттиришларсиз амалга оширади.
Изоҳ (0)