Кремлда анъанавий равишда 9 май куни ўтказиб келинадиган қабул ўтказилмайди. Бу ҳақда Россия президентининг матбуот котиби Дмитрий Песковга таяниб, “РИА Новости” хабар берди.
Жорий йилда ҳам ушбу тадбирни ўтказиш режалаштирилганми деган саволган матбуот котиб “йўқ” дея жавоб қайтарган.
9 май куни Россия президенти одатда Иккинчи жаҳон уруши қатнашчилари билан учрашар эди. Бу каби тадбирларнинг охиргиси 2019 йилда бўлган. Бундан ташқари, Катта Кремль саройида Москвадаги парадда иштирок этиш учун келган хориж делегациялари раҳбарлари қабул қилинарди.
Россиянинг Украина билан чегарадош бир қанча вилоятларида, шунингдек, босиб олинган Қримда 9 май куни ўтказиладиган ҳарбий парад бекор қилинган. Қозоғистон бюджет маблағларини тежаш учун бу йил ҳам ҳарбий парад ўтказилмаслигини эълон қилган.
Апрель охирларида Москвада Ғалаба куни муносабати билан ўтказиладиган байрам тадбирларига хориждан ягона етакчи — Қирғизистон раҳбари Садир Жапаров ташриф буюриши кутилаётгани маълум қилинганди.
2022 йилда Ғалаба кунини нишонлаш учун бирорта ҳам хорижий давлат раҳбари Москвага келмаган эди. Кремль буни чет эл раҳбарларини таклиф қилмагани билан изоҳлаган. “Бу юбилей санаси эмас. Бу бизнинг байрамимиз, бу бутун Россия учун, барча руслар учун муқаддас байрамдир”, — деган эди ўша пайтда Россия президентининг матбуот котиби Дмитрий Песков.
Россиянинг бир қатор ҳудудларида 2023 йил 9 май куни “хавфсизлик нуқтаи назаридан” Ғалаба кунида анъанавий парад ўтказилмайдиган бўлди. Москвадагилар “Ўлмас полк” маршини ҳам ўтказмайди.
Изоҳ (0)