Россия президенти Владимир Путин Тожикистон раҳбари Эмомали Раҳмонни Қизил майдонда бўлиб ўтадиган 9 май парадига таклиф қилди.
Тожикистон президенти сайтида хабар қилинишича, Путин телефон орқали мулоқот чоғида ўз таклифини билдирган. Суҳбат давомида томонлар халқаро ва минтақавий муаммолар, жумладан, тожик-афғон чегарасидаги вазият юзасидан ҳам фикр алмашган.
Тожикистон президенти матбуот котиби Абдуфаттоҳ Шарифзодага кўра, давлат раҳбари 9 май куни Москвага боришга ҳали қарор қилгани йўқ.
“Президент 9 май куни Душанбе шаҳридаги ‘Ғалаба’ боғидаги Мангу оловга гул қўйиш маросимида иштирок этади”, — деди у.
Москвадаги 9 май парадига кимлар таклиф қилинган?
Россиядаги ҳарбий парадларда хорижий давлатлар раҳбарлари, ҳарбийлар ва хорижий дипломатлар доимо иштирок этиб келган. Бироқ Россиянинг Украинага босқинидан сўнг, ҳатто Россияга дўст бўлган давлат раҳбарлари ҳам Москвага ташрифдан бош тортди.
Қирғизистон раҳбари Садир Жапаровнинг ташрифи эса бундан мустасно. У Москвага ташрифи доирасида 9 май парадида иштирок этувчи ягона давлат раҳбари бўлиб қолмоқда. Ҳали Тожикистон президенти парадда қатнашиш таклифини маъқулламаган.
Путиннинг матбуот котиби Дмитрий Песковнинг сўзларига кўра, ҳарбий парадда хорижий давлат раҳбарларидан фақат Қирғизистон президенти иштирок этади. Сабаби Жапаров 9 май арафасида Москвага келиши ва парадда иштирок этишини айтган.
“Қирғизистон президенти парад арафасида шу ерда бўлиши сабабли, албатта, у тадбирда қолишга қарор қилди. У байрамни ҳам, ғурурни ҳам биз билан баҳам кўрди”, — деган Песков.
Таъкидланишича, 2023 йил хорижий давлатлар раҳбарларига ҳарбий парадга таклифномалар юборилмаган.
“Бу йил хорижий етакчиларга махсус таклифномалар юборилмади. Бу юбилей санаси эмас ”, — деди Кремль матбуот котиби.
Россиянинг Украина билан чегарадош бир қанча вилоятларида, шунингдек, босиб олинган Қримда 9 май куни ўтказиладиган ҳарбий парад бекор қилинган. Қозоғистон бюджет маблағларини тежаш учун бу йил ҳам ҳарбий парад ўтказилмаслигини эълон қилган.
Изоҳ (0)