Қозоғистонда бу йил ҳам Ватан ҳимоячилари куни ва Ғалаба куни шарафига анъанавий ҳарбий парадни ўтказиш режалаштирилмаяпти. Бу ҳақда мамлакат Мудофаа вазирлиги матбуот хизматига таяниб, «Интерфакс» хабар берди.
Шу билан бирга, мамлакат Мудофаа вазирлиги бошқа қатор ҳарбий-ватанпарварлик тадбирларини ўтказиш режалаштирилганини таъкидлаган.
«Алоҳида блок Иккинчи жаҳон уруши ва Қозоғистон Қуролли кучлари фахрийларини шарафлаш тадбирларидан иборат бўлади. Мудофаа вазирлиги томонидан мамлакатнинг барча вилоятларида 50 га яқин турли тадбирларни ўтказиш режалаштирилган», — дейилади хабарда.
Қозоғистонда 7 май куни давлат байрами — Ватан ҳимоячилари куни, 9 май эса — Ғалаба куни сифатида нишонлаб келинади. 2020 ва 2021 йилларда коронавирус пандемияси сабаб ушбу байрамларга бағишланган ҳарбий парадлар бекор қилинганди.
Изоҳ (0)