Qozog‘istonning Ostona shahrida 7-may kuni G‘alabaning 80 yilligiga bag‘ishlangan harbiy parad bo‘lib o‘tdi. Unda to‘rt mingdan ortiq harbiy xizmatchi ishtirok etdi.
Paradda 200 dan ortiq harbiy qurol-yarog‘ va texnika, jumladan, 66 ta harbiy aviatsiya samolyoti hamda vertolyot namoyish etildi. Birinchi marta mexanizatsiyalashgan kolonna tarkibida “Buk”, “Tor” zenit-raketa komplekslari, “Barys”, “Alan”, “Aybar”, “Taymas”, “Terreks” jangovar mashinalari, shuningdek, minalarni zararsizlantirish uchun robotlar o‘rnatilgan maxsus avtomobillar taqdim etildi.
Shuningdek, mahalliy mudofaa sanoati korxonalari ishlab chiqarishni rejalashtirayotgan jangovar mashinalar, robotlashtirilgan qayiqlar va uchuvchisiz uchish apparatlari namoyish etildi. Osmonda A-400 harbiy-transport samolyoti, L-410 yo‘lovchi samolyoti va B-300 patrul samolyoti uchib o‘tdi.
Bu so‘nggi 5 yil ichida G‘alaba kuniga bag‘ishlangan birinchi harbiy paraddir. Unda Vyetnam hukmron partiyasi bosh kotibi To Lam rafiqasi bilan birga tadbirni tribunadan tomosha qildi.
Qo‘shni respublika 2020 va 2021-yillarda koronavirus pandemiyasi tufayli paradni bekor qilgan. 2022, 2023 va 2024-yillarda esa xarajatlarni tejash va boshqa vazifalar tufayli parad o‘tkazilmagan.
Parad ochilishida prezident Qosim-Jo‘mart To‘qayev bayonot berdi. U mamlakat bo‘ylab 500 ga yaqin ko‘chaga qozog‘istonlik jangchilar nomi berilishini aytdi.
Global siyosatga tajovuz va nafrat batsillalari kirib kelgan bugungi kunda davlatimizning barcha fuqarolariga urush haqidagi bor haqiqatni yetkazish juda muhimdir. Haqiqatsiz tinchlik qadrini bilib bo‘lmaydi. Urush va buyuk g‘alabaning ahamiyati haqidagi tarixiy haqiqatni buzib ko‘rsatishga yo‘l qo‘yib bo‘lmaydi, dedi siyosatchi.
To‘qayev global beqarorlik davrida Qozog‘iston uchun asosiy vazifa milliy manfaatlarni himoya qilish ekanini ta’kidladi.
Tashqi siyosatimiz shu maqsadni ta’minlashga qaratilgan. Qozoqlar tinchliksevar, shu bilan birga jasur va qat’iyatli xalqdir. Mamlakat mudofaa qobiliyatini oshirish bizning ustuvor vazifamiz. Qurolli kuchlarni modernizatsiya qilish va armiya salohiyatini mustahkamlash bo‘yicha qat’iy yo‘l tutdik, dedi u.
Siyosatchi o‘z nutqini “Vatanni himoya qilish — ulkan mas’uliyat”, deya yakunladi. U bu har bir fuqaroning muqaddas burchi ekanini xulosa qildi.
Izoh (0)