Польшада Россия разведка хизматлари буйруғи билан қўпорувчилик қилишда айбланган тўққиз киши ҳибсга олинди. Бу ҳақда Польша бош вазири Дональд Туск маълум қилди.
Тускнинг сўзларига кўра, улар ўт қўйиш, ўт қўйишга уриниш ва калтаклашда айбланмоқда. Польша бош вазири ҳибсга олинганларни ёлланма аскарлар деб атаган ва уларнинг баъзилари “жиноят оламидан келган одамлар” эканини айтган.
Туск саботажга мисол сифатида Вротславдаги бўёқ заводига ўт қўйишга уринишни келтирган. Польша ички хавфсизлик агентлигига кўра, у Россия махсус хизматлари кўрсатмаси билан Вротславда ўт қўйишни режалаштирган.
Тускнинг сўзларига кўра, худди шундай қўпорувчилик Литва, Латвия ва Швецияда ҳам амалга оширилмоқда. Унинг фикрича, май ойи бошида Литвада Ikea омборига ўт қўйишга масъул шахслар Польшадаги саботажга алоқадор бўлиши мумкин.
Аввалроқ Польша суди Россия ҳарбий разведкаси билан ҳамкорлик қилганликда айбланган Польша фуқароси Павел К.ни ҳибсга олган. Прокурорлар у Россия разведка идораларига Украина президенти Владимир Зеленскийга суиқасд уюштиришга ёрдам бериш учун маълумот тўплаганини айтган.
Изоҳ (0)