Еврокомиссия Польшада қонун устуворлигини жиддий бузиш хавфи энди йўқлигини айтди, дея Deutsche Welle хабар берди.
Маълум бўлишича, Еврокомиссия Польшага нисбатан олти йилдан кўпроқ вақт давомида кўрилган мамлакатдаги адлия ислоҳоти бўйича можаро туфайли бошланган суд жараёнини тугатади. Еврокомиссия раҳбари Урсула фон дер Ляйен Х’да Польша учун янги бобнинг бошланиши ҳақида ёзган. У мамлакат бош вазири Дональд Туск ва унинг ҳукуматини “ушбу муҳим ютуқ” билан табриклаган.
Бу Польшанинг машаққатли меҳнати ва ислоҳот йўлидаги қатъий саъй-ҳаракатлари натижасидир, — дея қўшимча қилган.
Еврокомиссиянинг ушбу таклифи 21 май куни Люксембургда бўлиб ўтадиган йиғилишда Европа Иттифоқига аъзо давлатларнинг Европа ишлари бўйича вазирлари томонидан муҳокама қилинади.
Брюссель ва Польшанинг аввалги миллий консерватив ҳукумати ўртасида суд-ҳуқуқ ислоҳотлари бўйича можаро 2016 йил бошидан бери давом этмоқда. Польша президенти Анжей Дуда умумий юрисдикция судлари тўғрисидаги қонунни имзолаганидан сўнг, 2017 йилда Еврокомиссия Европа Иттифоқи тарихида биринчи марта шартноманинг 7-моддасига асосланиб, унинг ЕИ стандартларига мувофиқлигини текшириш тартибини бошлаган эди.
Можаро пайтида Европа Иттифоқи Польша учун мўлжалланган кўп миллиард долларлик тўловларни музлатиб қўйган. Жараённинг бир қисми сифатида Варшавага Европа Иттифоқи Кенгашидаги овоз бериш ҳуқуқидан маҳрум қилиш билан таҳдид қилинган. 2023 йил октябрь ойида Тускнинг партияси сайловларда ғалаба қозонганидан сўнг, янги ҳукумат тузилган, у Польша адлия тизимида янги ислоҳотни бошлаган ва Брюссель талабларини бажарган.
Польшанинг янги адлия вазири Адам Боднар тегишли чора-тадбирлар режасини тақдим этганидан сўнг, Еврокомиссия Польша учун можаро пайтида музлатиб қўйилган 137 миллиард евро миқдоридаги маблағни блокдан чиқарган.
Польшадаги мунозарали суд-ҳуқуқ ислоҳоти адлия вазирининг суд раисларини ишдан бўшатиш ва уларни бошқа номзодлар билан алмаштириш ҳуқуқини тақдим этган.
Изоҳ (0)