Украина президенти Владимир Зеленский Польша бош вазири Дональд Туск билан учрашувдан сўнг бўлиб ўтган матбуот анжуманида АҚШ, Хитой ёки Европа Иттифоқи фаразий равишда Россия ва Украина ўртасида воситачи бўлиши мумкинлигини айтди.
Украина раҳбари фақат жиддий, кучли иттифоқлар воситачи бўлиши мумкинлигни таъкидлаган.
“Сизда Россияга таъсир қиладиган иқтисодингиз ёки Путин қўрқадиган жуда кучли армиянгиз бўлиши керак. Дунёда бундай давлатлар кўпми? Кўп эмас. Менимча, Қўшма Штатлар, Хитой ва Европа Иттифоқи шундай мамлакатлардан”, дейди Зеленский.
У, шунингдек, Россияга босим ўтказиш ва Путинни қандай тўхтатиш таклифни яна бир бор эслатган. Зеленскийнинг фикрича, давлатлар барча саъй-ҳаракатларни бирлаштириши керак.
Украина етакчиси Путин “заиф” давлатларни ҳурмат қилмаслигини қўшимча қилган.
Зеленский Венгрия бош вазири Виктор Орбан билан Киевдаги учрашувидан кейин Москвага бориш режаларидан хабардор эмаслигини ва бу Орбаннинг “мустақил танлови” эканини айтган. Венгрия бош вазири Виктор Орбан Путин билан учрашиш учун 5 июль куни Москвага ташриф буюрган эди. Суҳбат мавзуси Россия—Украина урушида сулҳ ўрнатиш имконияти бўлган.
Шундан сўнг Орбан Киевга ташриф буюриб, у ерда Владимир Зеленский билан учрашган. Қўшма матбуот анжуманида Орбан Будапешт Киевнинг тинчликка эришишга қаратилган ташаббусларини қадрлашини, бироқ уларни амалга ошириш кўп вақт талаб қилишига ишонишини таъкидлаган.
“Шундай экан, мен жаноб президентдан (Зеленский) ўт очишни тўхтатиб, кейин Россия билан музокаралар олиб боришни сўрадим, чунки ўт очишни тўхтатиш бу музокаралар суръатини тезлаштиради”, деган эди Орбан.
Изоҳ (0)