Польша ҳукумати қундузларнинг яшаш жойларини назорат қилиш ва улардан тўғонларга зарар етказмаслик имконини берадиган бир нечта қонуний ечимларни кўриб чиқади. Бу ҳақда мамлакат бош вазири Дональд Туск инқирозга қарши штаб йиғилишида маълум қилди.
“Сиз тўғонларда қундузларнинг мавжудлигини тез ўзгартиришни талаб қилаётган биринчи одам эмассиз. 2010 йилда биз бундай қарорлар қабул қилганмиз, у экологларни ғазаблантирган, лекин устуворликлар ҳам бўлган. Баъзан жониворларни севиш ёки шаҳарлар, қишлоқлар хавфсизлиги ва тўғонларнинг барқарорлиги ўртасида танлов қилишга тўғри келади”, деди Туск.
У амалдаги қонунлар доирасида қўлдан келган барча ишни қилиш кераклигини таъкидлаб, зарурат туғилганда янги ҳуқуқий ҳужжатларни қабул қилишга ваъда берди.
Польшалик мутахассисларнинг фикрича, қундузлардан тўғонларга зарар етказиш муаммосини бундай иншоотларни дарёлардан узоқроқда қуриш ёки уларни металл тўр билан қоплаш орқали ҳал қилиш мумкин.
Польшанинг жануби, жануби-ғарби ва ғарбидаги Силезия, Қуйи Силезия, Ополский, Любуш ва Кичик Польша ҳудудларида кучли ёмғирдан сўнг дарёлар сатҳининг кескин кўтарилиши туфайли кенг кўламли сув тошқинлари содир бўлди. Сув тошқинлари 1997 йилдан бери кузатилганлари орасида энг кучлиси деб баҳоланмоқда.
Полиция маълумотларига кўра, тошқинлар оқибатида етти киши ҳалок бўлган. 26 минг нафар ҳарбий хизматчи қутқарувчи ва ўт ўчирувчиларга кўмаклашмоқда. Тўртта ҳудудда тўрт юзга яқин мактаб ёпилган. Силезия, Қуйи Силезия ва Ополский ҳудудларидаги 28 та туманда табиий офат режими эълон қилинган.
Изоҳ (0)