Британия Украина учун тарихдаги энг катта ҳарбий ёрдам пакетини эълон қилди

Буюк Британия бош вазири Риши Сунак Украинага 570 миллион евро (617 миллион доллар) ажратишга ваъда берди, дея Deutsche Welle хабар берди.

Маълум бўлишича, ёрдам пакети 400 та автомобиль, зарба ва ҳаво ҳужумидан мудофаа учун 1600 та ракета ва 4 миллион ўқ-дорилардан иборат.

Украинани Россиянинг шафқатсиз олға силжишидан ҳимоя қилиш бизнинг хавфсизлигимиз ва бутун Европа учун жуда муҳим, — дейди Сунак Варшавага ташрифи олдидан.

У ерда Сунак Польша бош вазири Дональд Туск ва НАТО бош котиби Йенс Столтенберг билан Европа хавфсизлиги ва Россия таҳдидини муҳокама қилишни режалаштирмоқда.

Бош вазирининг сўзларига кўра, эълон қилинган маблағ ўқ-дорилар, ҳаво ҳужумидан мудофаа тизимлари, Британияда ишлаб чиқарилган дронлар етказиб бериш, шунингдек, фронт чизиғидаги ҳарбий техниканинг муҳандислик таъминоти учун сарфланади.

Буюк Британиянинг Киевга ёрдам пакети ажратиш ҳақидаги қарори АҚШ Конгресси Вакиллар палатасида Украинага ёрдам кўрсатиш бўйича қонун лойиҳасининг маъқулланиши фонида қабул қилинди. 

Аввалроқ Чехия бош вазири Петр Фиала ҳам Украина учун учинчи давлатларда ўқ-дорилар сотиб олиш бўйича Чехия ташаббусига дунёнинг 20 давлати аллақачон қўшилганини маълум қилганди. Фиаланинг сўзларига кўра, йиғилган маблағ Киевга 500 минг ўқ-дори етказишга имкон беради.