Ваҳима ҳужумларининг симптомлари кўпинча юрак-қон томир касалликларининг намоён бўлишини эслатади, бу эса беморларда ташвиш ҳолатини кучайтиради. Нейролог шифокор Сузанна Херимян бу ҳолатларни қандай ажратиш мумкинлигини айтиб берди.
Кўпинча кардиологга “нафас ололмаяпман, ҳаво етишмаяпти, юрак соҳасида оғриқ бор, юрагим кўкрагимдан чиқиб кетаётгандек” каби шикоятлар билан мурожаат қилишади. Бироқ батафсил текширувдан ва юрак касалликларини истисно қилгандан сўнг, улар кўпинча неврологга йўлланма олади.
Мутахассислар тушунтиришича, оғриқнинг табиати ҳам бошқача. Ваҳима ҳужуми учун кўкрак қафасида ўткир, санчувчи ва “келиб кетувчи” оғриқ хосдир. У юрак соҳасида сезилиб, аммо унинг тарқалиши аниқ эмас ва чуқур нафас олганда оғриқ кучайиши мумкин.
Инфарктда эса аксинча, оғриқ эзадиган, куйдирадиган ёки сиқадиган характерга эга бўлиб, кўкрак қафаси орқасида жойлашади ва баъзан чап қўл, елка, жағга ёки орқа томонга тарқалади. Бу оғриқ қоида тариқасида, нафас олиш ёки ҳаракатланишга боғлиқ эмас.
Симптомлар давомийлиги нуқтайи назаридан ваҳима ҳужуми одатда 5 дан 30 минутгача давом этади, шундан кейин оғриқ аста-секин пасаяди. Инфарктда эса аксинча, оғриқ узоқроқ давом этади ва вақти-вақти билан кучаяди.
Шифокорларнинг айтишича, ваҳима ҳужуми симптомлари тинч ҳолатда ҳам, стресс таъсирида ҳам намоён бўлиши мумкин. Жисмоний фаоллик унинг пайдо бўлишини енгиллаштириши мумкин. Юрак хуружи билан эса тескари ҳолат кузатилади: оғриқ жисмоний юклама пайтида кучаяди.
Бундан ташқари, ваҳима ҳужуми пайтида инсон ҳақиқий бўғилишсиз нафас қисилишини, қўл-оёқларда увишиш ва санчиқни, дереализация ва ўткир қўрқувни ҳис қилади, аммо жисмоний ҳолат ёмонлашмайди.
Юрак хуружида эса совуқ тер, рангпарлик, умумий заифлик, бош айланиши, пулснинг тартибсиз бўлиши шунингдек, кўнгил айниши ва қусиш каби қўшимча симптомлар бўлиши мумкин.
Изоҳ (0)