Ижтимоий тармоқларда Тошкент халқаро аэропортида Саудия Арабистонига зиёрат турларини ташкил этувчи туристик компаниялар учун чекловлар жорий этилгани ҳақида видеолар тарқалди. Uzbekistan Airports буни рад этди.
“Тошкент аэропорти ва Uzbekistan Airports бошқарув компанияси томонидан туристик фирмалар ва йўловчиларга нисбатан ҳеч қандай чекловлар киритилмаган”, дейилади компания хабарида.
Таъкидланишича, авиачиптага эга барча йўловчилар тегишли рейсларга ўз вақтида рўйхатдан ўтказилган. Ҳозиргача Саудия Арабистонига амалга оширилаётган икки рейс бўйича рўйхатдан ўтиш жараёни якунланди:
- Flyadeal авиакомпаниясининг Тошкент—Жидда йўналиши бўйича Ф39223 рейси: 352 йўловчи, режалаштирилган жўнаш вақти 19 февраль соат 00:10
- Centrum Air авиакомпаниясининг Тошкент—Жидда йўналиши бўйича C6 319 рейси: 176 йўловчи, режалаштирилган жўнаш вақти 19 февраль соат 00:20.
Бундан аввал ижтимоий тармоқларда умра ва ҳажга борувчиларга менингитга қарши эмланиш талаби бекор қилингани ҳақида хабарлар тарқалганди. Санепидқўмита бу хабарлар ҳақиқатга тўғри келмаслигини, Саудия Арабистони умра ва ҳаж зиёратларига борувчиларда менингит касаллигига қарши эмланганлик ҳақида ҳужжат бўлиши зарурлигини расман бекор қилмаганини маълум қилганди.
Изоҳ (0)