АҚШнинг Висконсин штатида яшовчи 17 ёшли Никита Касап ўз ота-онасини ўлдирди. Қотиллик президент Дональд Трампга суиқасдга уринишнинг бир қисми бўлган. Бу ҳақда махфийликдан чиқарилган ҳужжатларга таяниб CNN хабар берди.
Жиноий иш бўйича ҳужжатлар Федерал қидирув бюроси (ФҚБ) томонидан ошкор этилган. Унга кўра, вояга етмаган Касап 11 февралдаги қотилликдан сўнг 10 кундан ортиқ жасадлар билан бир уйда яшаган. Кейичалик у ўлдирилган ўгай отасининг машинасида кетаётганда ёнида ўқотар қурол билан полициячилар томонидан ушланган.
Ҳибсга олинганидан сўнг, ўсмир 7 май куни бўлиб ўтадиган суд эшитувларигача вақтинчалик сақлаш муассасасига жойлаштирилган.
Тергов давомида Касапнинг ота-онасини ўлдиришига “молиявий мустақиллик ва эркинликка эришиш” истаги сабаб бўлгани аниқланган. Бироқ ўсмирнинг телефонидан “Тўққиз бурчак ордени” (The Order of Nine Angles) номли неонацистик ташкилотга оид материаллар топилгач, тергов янада чуқурлашган.
Касап ушбу экстремистик гуруҳ аъзолари билан фаол алоқа қилгани, шунингдек, уч бетлик манифест ёзгани аниқланган. Унда АҚШ президентини ағдариш, “оқ ирқни қутқариш” зарурлиги, ўлдириш усуллари, бомба ясаш бўйича кўрсатмалар ва президентга қарши террорчилик ҳаракатларини амалга ошириш режалари баён этилган. Ҳужжатда, шунингдек, Адолф Гитлернинг суратлари ва “Hail Hitler hail the white race” матни ҳам аниқланган.
Терговга АҚШ Махфий хизмати ҳамда ФҚБ жалб этилган. Касап бошқарувидаги автомобилдан аёлларга тегишли тақинчоқлар, электрон қурилмалар, тахминан 14 минг доллар миқдоридаги нақд пул ва банк ҳужжатлари мусодара қилинган.
Шу билан бирга, терговчилар Касап Telegram’даги ёзишмаларида суиқасд содир этилган тақдирда Украинага қочиш имкониятини муҳокама қилганини аниқлаган.
Ҳозирда Касапга биринчи даражали қотиллик, фитна ва АҚШ президентига суиқасд қилишга уриниш каби тўққизта айблов қўйилган. Гумонланувчи ҳозирда АҚШ федерал қамоқхоналаридан бирида сақланмоқда, агар унинг айби исботланса, у кўп йиллик қамоқ жазосига ҳукм қилиниши мумкин.
Изоҳ (0)