Гаагадаги Халқаро жиноий суд (ХЖС) Россиянинг узоқ масофали авиация қўмондони Сергей Кобилаш ва Россия Қора денгиз флоти қўмондони Виктор Соколовни ҳибсга олишга ордер берди. Бу ҳақда ХЖС расмий сайтида хабар берилди.
Россиянинг икки фуқаросига нисбатан ордерлар Украинадаги вазият бўйича камида 2022 йил 10 октябрдан 2023 йил 9 мартгача содир этилган эҳтимолий ҳарбий жиноятлар сабабли чиқарилган. Улар Рим Статутининг тегишли моддалари бўйича фуқаролик объектларига ҳужумлар уюштириш, тинч аҳолига ёки фуқаролик объектларига зарар етказиш, инсониятга қарши ҳарбий жиноятлари учун жавобгардир.
Рус қўмондонларини ҳибсга олиш учун ордерлар ХЖСнинг II Судгача бўлган палатаси томонидан чиқарилган. Икки гумонланувчи камида 2022 йил 10 октябрдан 2023 йил 9 мартгача ўз назорати остидаги кучлар томонидан Украина электр энергетика инфратузилмасига уюштирилган ракета ҳужумлари учун жавобгар бўлганига кучли асослар бор.
Бу вақт оралиғида Россия армияси томонидан Украинанинг кўплаб жойларида электр станциялари ва подстанцияларга қарши ҳужум кампанияси бўлган. Мўлжалланган ҳужумлар фуқаролик объектларига қарши қаратилган.
Бундан ташқари, тинч аҳолига кутилган зарар ҳарбий устунликка нисбатан ҳаддан ташқари катта эди. Гумонланувчилар, шунингдек, инсониятга қарши жиноят, яъни қасддан катта азоб-уқубат, танага ёки руҳий ёхуд жисмоний соғликка жиддий шикаст етказадиган бошқа ғайриинсоний ҳаракатлар учун жавобгардирлар, — дейилади ХЖС сайтида.
Сергей Кобилаш
58 ёшли генерал-лейтенант, Одессада туғилган, Россия Аэрокосмик кучларининг узоқ масофали авиацияси қўмондони. Биринчи ва Иккинчи Чечен уруши, Россия-Грузия уруши, Суриядаги уруш ва Россиянинг Украинага бостириб киришида иштирок этган.
Унинг раҳбарлиги остида Мариуполни бомбардимон қилиш амалга оширилди, бу эса тинч аҳоли инфратузилмасининг сезиларли даражада вайрон бўлишига ва қурбонларга олиб келди.
Виктор Соколов
61 ёшли адмирал, 2022 йил 10 августдан бери Россия Қора денгиз флоти қўмондони. У Россиянинг Украинага қарши урушида бевосита иштирок этган.
Бироқ, 2023 йил 25 сентябрда ОАВ Украина қуролли кучларига таяниб, Соколов 22 сентябрь куни Қора денгиз флоти штаб-квартирасига Storm Shadow ёрдамида ракета ҳужуми натижасида ҳалок бўлганини хабар қилди. Бироқ, Америка разведка хизматлари 29 сентябрь ҳолатига кўра, эҳтимолий ўлим ҳақидаги маълумотларни тасдиқлаб ёки рад этиб бўлмаслигини маълум қилди.
Изоҳ (0)