НАТО Россиянинг альянс аъзоларидан бирига эҳтимолий ҳужуми сценарийлари устида ишламоқда. Бу ҳақда ҳарбий блокнинг юқори мартабали вакилларига таяниб, Bloomberg хабар берди.
Манбаларга кўра, кўплаб ғарб генераллари йиғилган Мюнхен Хавфсизлик конференциясидаги мунозараларда пессимизм ҳукмронлик қилган. Улар Украинанинг жанг майдонидаги “муваффақиятсизликлари”, шунингдек, АҚШнинг Киевга қўшимча маблағ ажратмагани ва қўллаб-қувватлашнинг камайгани “Россияни НАТО аъзосига тўғридан тўғри ҳужум қилишга ундаши мумкин”лигини айтган.
Шу сабабли Ғарб генераллари эҳтимолий ҳужумни қайтариш учун сценарий ишлаб чиқишни бошлаган.
“НАТО ҳудудига ҳужум бўладими ёки йўқми, башорат қила олмайман. Аммо бу беш-саккиз йил ичида содир бўлиши мумкин”, — дейди Германия мудофаа вазири Борис Писторус Bloombergъга.
2023 йил ноябрида НАТО бош котиби Йенс Столтенберг Украинада уруш бошланганидан сўнг альянснинг иккита асосий вазифаси Киевга ёрдам кўрсатиш ва альянс ҳамда Россия ўртасида тўлақонли урушга олиб келиши мумкин бўлган кескинлашувнинг олдини олиш эканини айтди. Шу билан бирга, у альянс дунё ҳарбий қудратининг ярмини ташкил этишини ва ҳарбий жиҳатдан Москвадан устун эканини таъкидлади.
Россия президенти Владимир Путин аввалроқ Россиянинг НАТОга эҳтимолий ҳужуми ҳақидаги даъволар “мутлақо бемаънилик” эканини, Москванинг иттифоқ мамлакатларига ҳудудий даъвоси йўқлигини айтганди.
Изоҳ (0)