Саудия Арабистонида нефть компанияси (Saudi Aramco) 14 та янги нефть ва газ конларини аниқлади. Бу топилмалар давлатнинг глобал энергетикада етакчилигини янада мустаҳкамлайди. Бу ҳақда Arab News хабар берди.
Конлар аниқлангани ҳақида энергетика вазири шаҳзода Абдулазиз бин Салмон маълум қилган. Унга кўра, 8 та нефть (умумий ҳажми кунига 8 126 баррелни ташкил этади) ва 6 та табиий газ конлари (кунига 80,5 миллион стандарт куб фут) кашф этилган. Дунёдаги энг йирик нефть экспортчиси бўлган қироллик февраль ойида кунига 9 миллион баррелга яқин нефть қазиб олди.
Бу қиролликнинг гидрокарбон бойликлари салоҳияти кенг ва ўсишда давом этаётганини кўрсатади. Вазир сўнгги кашфиётларнинг аҳамиятини таъкидлаб, улар қиролликнинг глобал энергетика соҳасидаги етакчи ўрнини мустаҳкамлаш, ички ва глобал энергия эҳтиёжини қондириш қобилиятини кучайтиришини айтди.
Маълумот ўрнида, АҚШ божлари сабаб дунёда нефть нархи сўнгги 4 йилдаги энг паст даражага тушди. Brent маркали нефть фьючерслари 3,79 фоизга арзонлашиб, бир баррел учун 60,44 долларни ташкил этди. АҚШнинг WTI маркали нефти эса 4,13 фоизга тушиб, 57,12 долларга етди. Бу 2021 йил февралидан бери энг паст кўрсаткичдир. Brent ва WTI фьючерслари беш савдо сессиясидан бери кетма-кет пасаймоқда.
Изоҳ (0)