Глобал нефтга бўлган талаб тобора секин ўсиб бормоқда. Хитойнинг экологик тоза ёнилғига ўтиши ва бошқа ривожланган мамлакатларда бензинга бўлган талабнинг пасайиши бунга сабаб бўлмоқда. Халқаро энергетика агентлиги сентябрь ойидаги тегишли ҳисоботини эълон қилди.
Ҳисоботга кўра, сўнгги ойларда Хитой бошчилигида жаҳон нефтга бўлган талабнинг тез пасайиши нефть бозорларида кескин нарх тушишига олиб келган. Ливияда етказиб беришдаги сезиларли йўқотишлар ва хом нефть захираларининг давомий камайишига қарамасдан, Brent нефти фьючерслари августда бир баррел учун 82 доллардан юқори бўлган максимал нархдан 11 сентябрда деярли уч йиллик энг паст кўрсаткич — 70 доллардан бир оз пастроққа тушди.
Шу билан бирга, қора олтинга бўлган талаб йилнинг биринчи ярмида йиллик ҳисобда 800 кб/д (кунига 1000 баррел) га ошди, бу 2023 йилда қайд этилган 2,3 мб/д (кунига миллион баррел) ўсишидан сезиларли даражада паст. Умуман олганда, бир йил ичида нефтга жаҳон талаби 2024 йилда атиги 900 кб/д га, келгуси йилда эса 950 кб/д га ошиши кутилмоқда.
Электромобильлар савдосининг ўсиши анъанавий автомобиллар учун ёнилғига бўлган талабни пасайтиради, юқори тезликда ҳаракатланувчи темир йўлларнинг кенг миллий тармоғи жадал ривожланиши эса ички авиаташувлар ўсишини чеклайди.
Ҳисобот муаллифлари таъкидлашича, Хитойдан ташқарида нефтга бўлган талаб ўсиши энг яхши ҳолда ҳам суст. АҚШга оид сўнгги маълумотлар май ойидаги кутилмаган ўсишдан кейин июнь ойида бензин етказиб бериш кескин пасайганини кўрсатмоқда.
Айтилган барча фикрлар натижасида, бу йил ривожланган иқтисодиётга эга мамлакатларда нефть истеъмоли пандемиядан олдинги даражадан деярли 2 мб/к паст бўлиши мумкин.
"Сентябрь ойи бошида Саудия Арабистони ва унинг ОПЕК+ бўйича иттифоқчилари нефть нархининг кескин пасайишини тўхтатиш учун режалаштирилган қўшимча ихтиёрий қисқартиришларни бошлашни икки ойга кечиктиришини эълон қилди. Кечикиш уларга кейинги йил учун талаб истиқболларини баҳолашда бир оз вақт беради.
Умуман олганда, август ойида жаҳон нефть таклифи кунига 80 минг баррелга кўпайиб, 103,5 миллион баррелга етди. Шу билан бирга, Ливияда юз берган сиёсий келишмовчилик туфайли юзага келган узилишлар ҳамда Норвегия ва Қозоғистондаги техник хизмат кўрсатиш ишлари Гайана, Бразилия ва бошқа мамлакатлардан келаётган юқори ҳажмдаги оқимлар ҳисобига қопланди.
Изоҳ (0)