Саудия Арабистони валиаҳд шаҳзодаси Муҳаммад бин Салмон Қиддия шаҳрининг режаси ва брендини тақдим этди, унинг тахминий қиймати 2,67 миллиард долларни ташкил қилади, деб хабар бермоқда Аrabinform.
Қиддияга сифатли сармоя киритиш “Vision 2030” режасининг асосий мақсадларидан бири бўлиб, у иқтисодиётнинг даромад манбаларини диверсификация қилишга қаратилган.
Валиаҳд шаҳзода яқин келажакда шаҳар кўнгилочар, спорт ва маданият соҳасида дунёнинг энг машҳур нуқтасига айланиши ва иқтисодиёти бўйича дунёнинг энг йирик шаҳарлари ўнталигига киришини таъкидлади.
Қиддия шаҳри Давлат инвестиция жамғармасининг йирик лойиҳаларидан бири ҳисобланади.
Шаҳар 360 квадрат километр майдонда ётади ҳамда 60 000 та бинодан иборат бўлади. Ҳудудда 600 000 дан ортиқ одамни яшаши, 325 000 дан ортиқ иш ўрни яратилиши режалаштирилган.
Қиддия ҳар йили 48 миллион ташриф буюрувчини жалб қилиш ва мамлакат ялпи ички маҳсулотини тахминан 36 миллиард долларга оширишни режалаштирмоқда.
Қиддия шаҳри Саудия Арабистони пойтахти Ар-Риёднинг ғарбида, Тувайқ тоғларининг қоқ марказида жойлашган бўлиб, электрон ўйинлар штаб-квартираси, автоспортга бағишланган зона ва “Формула 1” пойга йўлини ўз ичига олади.
Шунингдек, у иккита голф майдончаси, дунёдаги энг катта Олимпия музейига эга футбол шаҳарчаси, “Six Flags” кўнгилочар шаҳарчаси ва аквапаркдан иборат бўлади. Дастлабки объектлар яқин икки йил ичида очилади.
Сентябрь ойида Ал-Акария кўчмас мулк компанияси (65 фоизи Саудия давлат инвестиция фондига тегишли) ўзининг шўба корхоналаридан бирига 611 миллион долларлик “Қиддия” лойиҳаси доирасида инфратузилма ишлари пакети бўйича шартномалар топширилганини эълон қилди.
“Vision 2030” режаси билан Саудия Арабистони қироллик иқтисодиётини нефть секторидан узоқлаштиришга ҳамда Қиддия, “Қизил денгиз”, “NEOМ”, “Дирияҳ” ва “Амала” каби нонефть секторларини ривожлантиришга ёрдам берадиган миллиардлаб долларлик бир қанча йирик лойиҳаларга умид қилмоқда.
Қироллик ушбу шаҳарлар Саудиянинг ялпи ички маҳсулоти ўсиш суръатини 50 фоизга кўтариш, хусусий сектор улушини 65 фоизга ошириш ва ялпи ички маҳсулотдаги тўғридан тўғри хорижий инвестициялар улушини 5,7 фоизга оширишни ўз ичига олган 2030 йилга мўлжалланган мақсадларга ҳисса қўшишини таъкидламоқда.
Изоҳ (0)