Saudiya Arabistonida neft kompaniyasi (Saudi Aramco) 14 ta yangi neft va gaz konlarini aniqladi. Bu topilmalar davlatning global energetikada yetakchiligini yanada mustahkamlaydi. Bu haqda Arab News xabar berdi.
Konlar aniqlangani haqida energetika vaziri shahzoda Abdulaziz bin Salmon ma’lum qilgan. Unga ko‘ra, 8 ta neft (umumiy hajmi kuniga 8 126 barrelni tashkil etadi) va 6 ta tabiiy gaz konlari (kuniga 80,5 million standart kub fut) kashf etilgan. Dunyodagi eng yirik neft eksportchisi bo‘lgan qirollik fevral oyida kuniga 9 million barrelga yaqin neft qazib oldi.
Bu qirollikning gidrokarbon boyliklari salohiyati keng va o‘sishda davom etayotganini ko‘rsatadi. Vazir so‘nggi kashfiyotlarning ahamiyatini ta’kidlab, ular qirollikning global energetika sohasidagi yetakchi o‘rnini mustahkamlash, ichki va global energiya ehtiyojini qondirish qobiliyatini kuchaytirishini aytdi.
Ma’lumot o‘rnida, AQSH bojlari sabab dunyoda neft narxi so‘nggi 4 yildagi eng past darajaga tushdi. Brent markali neft fyucherslari 3,79 foizga arzonlashib, bir barrel uchun 60,44 dollarni tashkil etdi. AQSHning WTI markali nefti esa 4,13 foizga tushib, 57,12 dollarga yetdi. Bu 2021-yil fevralidan beri eng past ko‘rsatkichdir. Brent va WTI fyucherslari besh savdo sessiyasidan beri ketma-ket pasaymoqda.
Izoh (0)