Саудия Арабистонининг 88 ёшли қироли Салмон бин Абдулазиз ал-Сауд ўпка яллиғланишидан азият чекмоқда. У 6 октябрь куни тиббий кўрикдан ўтди. Бу ҳақда SPA ахборот агентлиги хабар берди.
Қирол шифокорларнинг тавсиясига асосан тиббий кўрикдан ўтган, дейилади Саудия Арабистони матбуот агентлиги хабарида. Май ойида қирол юқори иситма, бўғимлардаги оғриқлар ва ўпка яллиғланиши туфайли тиббий кўрикдан ўтганди ва антибиотиклар қабул қилганди. У Жиддадаги саройда даволанган.
Қирол Салмон 2015 йилдан буён дунёдаги энг йирик (хом)нефть экспортчиси бўлган мамлакатни бошқариб келмоқда, бироқ унинг ўғли, валиаҳд шаҳзода Муҳаммад бин Салмон де-факто бошқарувчи сифатида кўрилади. 39 ёшли шаҳзода Муҳаммад кундалик ишларнинг аксариятини юритади ва тахт ворислигида навбатдаги номзод ҳисобланади.
Изоҳ (0)