Бирлашган Миллатлар Ташкилоти (БМТ) Украинада уруш бошланганидан бери ўнлаб ҳарбий асирларнинг қатл этилганини ҳужжатлаштирганини маълум қилди. Бу ҳақда CNN хабар берди.
БМТ Инсон ҳуқуқлари бўйича Олий комиссари бошқармаси ҳисоботида 15 нафар украиналик ҳарбий асирнинг Россия қўшинлари томонидан қатл этилиши, улардан тирик қалқон сифатида фойдаланиш, тиббий ёрдам кўрсатилмагани сабабли икки ярадорнинг ўлими, қийноқлар ҳақида сўз боради.
Ҳужжатда Украина Миллий гвардияси зобити ҳақида маълумот келтирилган. Жумладан, у 2022 йил апрелда Мариуполдаги радиостанцияга кириш паролини беришдан бош тортгани учун қийноққа солинган ва қатл этилган. У Бахмут жанубидаги қишлоқда “Вагнер” гуруҳи томонидан қўлга олинган. Унинг кўкрак қисмига учта ва бошига битта ўқ узишган.
“Ҳарбий асирларга ҳужум халқаро ҳуқуқ томонидан тақиқланган ва қасддан қилинган бўлса, ҳарбий жиноят ҳисобланади”, — дейилади ҳисоботда.
Шунингдек, БМТ камида 25 нафар россиялик ҳарбий асирнинг қатл этилгани ҳақида маълумот олганини маълум қилди. Унга кўра, россиялик ҳарбийга алоқадор воқеалардан бири 2022 йилнинг март ойида Луганск вилоятида содир бўлган.
“Россияга алоқадор қуролли гуруҳларнинг баъзи аъзолари таслим бўлишдан бош тортгандан сўнг украиналик аскарлар томонидан ўлдирилган. Россиялик жангчиларнинг айримлари артиллериядан ўт очилиши оқибатида ярадор ёки ўлган бўлиши мумкин”, — дейилган хабарда.
Украина БМТ гуруҳларига россиялик ҳарбий асирлар олдига кириш имкониятини бергани келтирилади. Шу билан бирга, Россия томонидан бундай рухсат тақдим этилмагани қайд этилган. Август ойида БМТ гуруҳига ишғол қилинган Луганскда сақланаётган 13 нафар украиналик ҳарбий асирлар гуруҳи билан учрашишга рухсат берилган биргина ҳолат бўлган. Бироқ уларни сўроқ қилишга рухсат берилмаган.
Изоҳ (0)