Доминикан Республикаси пойтахти Санто Домингодаги машҳур тунги клубда 8 апрель куни том қулаб тушиши оқибатида 79 киши ҳалок бўлди. Клубда сиёсатчилар, спортчилар ва бошқа машҳурлар иштирокида концерт бўлаётганди. Бу ҳақда AP News хабар берди.
Қутқарувчилар том қулаганидан қарийб 12 соат ўтгач ҳам вайроналар остидан одамларни тирик ҳолда чиқарган. Ҳодиса оқибатида 160 нафардан ортиқ одам жароҳатланган. Jet Set номли бир қаватли клуб харобалари остида тирик қолганларни қидириш ишлари давом этмоқда.
Биз уларнинг кўпчилиги ҳали тирик бўлиши мумкин, деб тахмин қиляпмиз. Шу сабабли бу ерда ҳокимият вакиллари охирги одам топилмагунча тўхтамайди, деди Фавқулодда вазиятлар бўйича операциялар маркази раҳбари Хуан Мануэл Мендес.
Қурбонлар орасида шимоли-ғарбий Монтекристи вилояти губернатори, етти карра бейсбол юлдузи Нелсон Круз ва унинг опаси ҳам бор. Жароҳат олганлар орасида эса собиқ Америка бейсбол лигаси ўйинчиси Октавио Дотел, қонунчи Брай Варгас ва машҳур меренгуэ хонандаси Руббй Перес бор. Перес саҳнада ижро этаётганида клуб томи томошабинлар устига қулаган.
Концерт ярим тунга яқин бошланган ва тахминан бир соатдан кейин том қулаб тушган. Оқибатда гуруҳнинг саксофончиси ҳалок бўлгани айтилди.
Ҳамма нарса жуда тез содир бўлди. Мен ўзимни бурчакка отишга улгурдим, деди Переснинг менежери Энрике Паулино. Аввалига у мазкур ҳодисани зилзила деб ўйлаганини қўшимча қилди.
Томнинг қулашига нима сабаб бўлгани ҳозирча номаълум. Президент Луис Абинадер ижтимоий тармоқдаги саҳифасида барча қутқарув хизматлари “тинмай ишлаётгани”ни маълум қилди. Клуб яқинида вақтинчалик морг ташкил қилинган. Шунингдек, икки марказда қон топшириш учун 120 дан ортиқ кўнгиллилар навбатга турган.
Изоҳ (0)