Тошкент вилоятининг Паркент туманидаги хусусий ҳайвонот боғида қоровул учта шер ҳужумидан ҳалок бўлгани ҳақида хабар берилганди. Ҳолат юзасидан суд иши якунланди.
Ҳодиса 2024 йил 17 декабрь куни соат, тахминан, тонгги 05:00 ларда содир бўлган. 3 та Африка шери қафасдан ҳайвонот боғи ҳудудига катак эшиги очиқ қолдирилганидан фойдаланиб чиққан. Сўнг шерлар уларни катакка қайтармоқчи бўлган 1980 йилда туғилган қоровул Ф.I.га ҳужум қилган, қоровулни ўлдирган.
Мазкур ҳолат ҳайвонот боғи ходимлари томонидан соат 09:00 ларда аниқланиб, 2 та шер ухлатувчи дори воситалари қўлланган ҳолда катакка қайтарилган. 1 та шер эса маҳаллий овчи томонидан отиб ўлдирилган.
Ушбу воқеа юзасидан хусусий ҳайвонот боғи директорига нисбатан жиноят иши қўзғатилиб, эҳтиёт чораси сифатида қамоққа олинган эди. Судланувчи Жиноят кодексининг 257-моддаси иккинчи қисмининг бандида назарда тутилган жиноятни содир этганликда айбдор деб топилди ва унга ушбу моддага асосан уч йил муддатга озодликни чеклаш жазоси тайинланди. Қамоққа олиш эҳтиёт чораси бекор қилиниб, у дарҳол суд залида қамоқдан озод қилинди.
Ўзбекистон ҳайвонот боғларида йиртқичлар қурбонига айланган инсонлар
Овқат бераман деб ...
2023 йилнинг 3 январь куни Хўжаобод туманида жойлашган Андижон ҳайвонот боғи ишчиси овқат бериш мақсадида айиқнинг қафасига кирган вақтида йиртқич ҳамласига учраб ҳалок бўлганди.
Ўшанда ҳайвонот боғи масъуллари, воқеа жойига борган “Дарё” мухбирига айтишича, фожиа марҳумнинг хавфсизлик қоидаларига амал қилмагани оқибатида рўй берганини таъкидлашган.
Ҳодиса қафасга ўрнатилган кузатув камераси томонидан қайд этилган бўлиб, тасвирда чиндан ҳам марҳум хавфсизлик талабларига риоя қилмаганини кўриш мумкин.
Шер ҳамласига учраган яна бир қоровул
2018 йил 30 декабрь куни Андижон ҳайвонот боғи қоровули қафасда сақланаётган Симба лақабли шерга овқат бераётган чоғида йиртқич уни тилкалаб ташлаган. Оқибатда 45 яшар эркак ҳодиса жойига вафот этганди.
Суд-тиббиёт экспертизасининг дастлабки хулосасига кўра, марҳумнинг ўлимига бўйин ва тананинг бошқа соҳаларидаги кўплаб очиқ жароҳатлар ва ўткир қон томир етишмовчилиги сабаб бўлган. Фожиа шернинг оч қолиб кетиши оқибатида рўй бергани айтилмоқда.
Бош прокуратура ҳам қоровул, ҳам ҳайвон боқувчи бўлиб ишлаган марҳум ҳайвонот боғида боқилаётган иккита шер ёнига улар билан ўйнаш мақсадида қафас ичига кирганида йиртқичлар ҳужумига учрагани келтирилади. Хорижий нашрлар эса фожиа шерларнинг оч қолиб кетгани оқибатида юз бергани хусусида ёзган.
Қочиб кетган йиртқичлар
2018 йили Самарқанд туманида “Дурбек” кўчма ҳайвонот боғига тегишли шерлар қафасидан чиқиб кетади. Уларни ушлашнинг иложи бўлмаганидан сўнг сўнгги чора сифатида отиб ўлдирилади.
Бахтли тасодиф туфайлигина шерлар на кўчма ҳайвонот боғи ходимларига ва на аҳолига зарар етказган. Тезкорлик билан қабул қилинган қарор туфайли рўй бериши эҳтимоли юқори бўлган фожианинг олди олинган.
Натижаси номаълум жиноят ишлари
Андижондаги ҳайвонот боғида рўй берган бир эмас, иккита фожиадан кейин ҳам худди шундай жиноят ишлари қўзғатилганди. Бироқ масъул идоралар тергов якуни юзасидан расмий ахборот бермаган.
Жамоатчилик жавобгарларга нисбатан қандай чора кўрилгани, жабрланувчиларнинг оиласига компенсация тўлаб берилганми ёки йўқ, бу ҳақда ҳеч қандай маълумотга эга эмас.
Ҳайвонот боғлари керакми?
Бугунги кунда Ўзбекистонда юқоридаги фожиалар рўй берган муассасалардан ташқари республикамизнинг қарийб барча ҳудудида ҳайвонот боғлари мавжуд. Худди Паркентдаги зоопарк сингари уларнинг айримлари хусусий, айримлари эса давлат тасарруфида.
Бутун дунёдаги ҳайвонлар ҳимояси билан шуғулланувчи фаоллар зоопарклар фаолиятига қарши курашиб келишади. Уларнинг фикрича, бундай муассасаларда инсонлар ҳайвонларга нисбатан шафқатсиз муносабатда бўлишади, шу сабабли ҳам уларнинг фаолиятини тўхташиш зарур.
Ўзбекистонда ҳам ҳайвонот боғларида сақланаётган ҳайвонларга нисбатан ўта ёмон муносабатда бўлинган ҳолатлар кузатилган. Жумладан, Нукусдаги ҳайвонот боғида айиқ сувсиз қолдирилиб таҳқирланган, Навоийдаги ҳайвонот боғида узоқ вақт давомида ёмон шароитда сақланган ҳайвонлар пойтахтга олиб келинган, Фарғона ҳайвонот боғидаги жирафа аномал совуқда шамоллаб қолгани ортидан нобуд бўлган эди.
Бироқ мазкур ҳодисаларнинг барчаси хусусий зоопаркларда юз берган. Шу сабабли ҳам экофаоллар Ўзбекистон шароитида хусусий ҳайвонот боғларига эҳтиёж борлигини сўроқ остига олишади.
Изоҳ (0)