Andijon viloyatidagi hayvonot bog‘ida ayiqqa ovqat berayotgan bog‘ ishchisi ayiq hujumi sabab vafot etdi. “Daryo” muxbiri bilan suhbatlashgan mas’ullar ishchi xavfsizlikka rioya qilmaganini aytmoqda.
O‘zini marhumning qizi deb tanishtirgan Malika Qodirovaning aytishicha, dadasi hayvonlarga eshik oldida yem berayotgan bo‘lgan. Shu payt ayiq qafasdan qochish maqsadida unga hujum qilib, o‘ng tomonini yirtib, boshini uzib tashlagan.
Otam “zoopark”da ishlardi. 3-yanvar kuni ayiq hujum qilib, halok bo‘ldi. Sheriklarining aytishicha, u ayiqqa yem berayotgan bo‘lgan. Shunda ayiq qochmoqchi bo‘lib, qafasni yopishga uringan dadamga hujum qilgan. Va o‘ng tomonini yirtib tashlagan, boshini uzib olgan. Boshliqlariga videosini menga ham qo‘yib bering desam, berishmadi. Bunday deganimning sababi dadamning o‘limi “zoopark”dagi birinchi o‘lim emas, ikkinchisi hisoblanadi. Boshlig‘i dadamni ko‘mib berdi, xolos. Boshqa sharoit yaratib bermadi. Bular dadamni ko‘mgani olti million pul berib, shu bilan yo‘q bo‘lib ketishyapti. Ichki ishlardan hech kim kelmadi, hech narsa demadi. To‘g‘ri, o‘tib qolgan kuni “militsiya”dan bordi, nomerlarini olishdi-yu ketishdi. Shu bo‘yi tergov yoki hech qanday ish ochishmadi. Hech kim harakat qilayotgani yo‘q, — deydi marhumning qizi.
“Daryo” muxbiri holatni o‘rganish maqsadida hayvonot bog‘ida ham bo‘lib, bog‘ rahbariyati bilan ko‘rishdi. O‘zini hayvonot bog‘i boshqaruvchisi Azizillo deb tanishtirgan shaxs voqea haqiqatan ham yuz berganini, biroq voqea marhumning qizi aytganidek emas, ishchining xavfsizlik qoidalariga amal qilmasligi ortidan kelib chiqqan.
2022-yildan buyon shu yerda boshqaruvchi bo‘lib ishlayman. Har kuni barcha xodimlar texnika xavfsizligidan o‘tishadi. Bu alohida kitobda ro‘yxatga olinib, imzolatiladi. Shunday qilmasak bo‘lmaydi. Chunki, o‘zingizga ma’lum bu yerda yovvoyi hayvonlar boqiladi. Shu sababli har bir xodimga alohida tushuntirish beriladi.
Ayrim xodimlarimiz shu yerda navbati bilan qolib, hayvonlarga qaraydi. O‘sha kuni men uyga ketgandim. Kechga yaqin shunaqa xabar berishdi, yetib keldim. Bolalarning aytishicha, qish bo‘lgani uchun ayiqlarning bittasi yopinib olib uxlayotgan bo‘lgan. Ikkinchi ayiq uyg‘oq bo‘lgan. Ishchimiz qafas eshigini ochib, ichkariga kirib olgan. Bir-ikki kun avval ham shunday qilganida unga bunday qilmasligi kerakligini uqtirgandik. Ammo o‘zingiz bilasiz ruslar hayvonlarga mehribon bo‘ladi. Shuning uchun kirib olgan. Kutilmaganda ayiq unga hujum qilgan va og‘ir tan jarohati yetkazgan. Yordamlarga qaramasdan ishchi vafot etgan, — deydi boshqaruvchi.
Boshqaruvchi voqea yuz bergan kunning o‘zida Ichki ishlar hamda tez tibbiy yordam xodimlari voqea joyiga yetib kelib, vaziyatni o‘rganishganini, qo‘shimcha ma’lumotlarni Ichki ishlar xodimlaridan olish mumkinligini bildirgan.
“Daryo” muxbirlari, shuningdek, marhum xonadonida ham bo‘lib, uning oila a’zolari bilan suhbatlashishga uringan. Biroq hovli eshigi ochiq bo‘lsa-da xonadon ichkarisidan hech kim javob bermagan.
Andijon viloyati Ichki ishlar boshqarmasi matbuot xizmatining “Daryo”ga ma’lum qilishicha, voqea 3-yanvar kuni soat 16:00 larda Xo‘jaobod tumani “Mustaqillikning 27 yilligi” MFY hududida joylashgan Andijon hayvonot bog‘ida sodir bo‘lgan.
Mazkur holat Xo‘jaobod tumani IIB tomonidan tegishli tartibda ro‘yxatdan o‘tkazilib, hodisa joyi tuman IIB tezkor-tergov guruhi tomonidan ko‘zdan kechirilgan. Fuqaro A.G.ning olgan tan jarohatlari og‘irlik darajasi va uning o‘limi sababini aniqlash maqsadida sud-tibbiyot ekspertizasi tayinlangan.
Holat yuzasidan Xo‘jaobod tumani IIB huzuridagi Tergov guruhi tomonidan tergovga qadar tekshiruv harakatlari olib borilmoqda.
Izoh (0)