“Anomal sovuqda shamollab qolgan ekan”. Farg‘ona hayvonot bog‘idagi jirafaning o‘limiga ochlik sabab bo‘lgani rad etildi

Ijtimoiy tarmoqlarda Farg‘ona hayvonot bog‘idagi jirafa anomal sovuq sabab nobud bo‘lgani haqida xabarlar tarqaldi. “Daryo” muxbiri mazkur holatga oydinlik kiritish maqsadida hayvonot bog‘i rahbari Tursunali Mamajonov bilan suhbatlashdi. 

Mamajonovning aytishicha, Maksim laqabli jirafa Farg‘onaga 2018-yil Qozog‘istonning Olmaota shahridagi hayvonot bog‘idan olib kelingan. Jirafa hayvonot bog‘ida 4 yil yashagan. 

U O‘zbekistonda kuzatilgan anomal sovuq kunlarida shamollab qolgan va shuning oqibatida joriy yilning 20-yanvar kuni nobud bo‘lgan. 

“Bu jirafani 2018-yilda Olmaotadagi hayvonot bog‘idan olib kelganman. O‘shanda u kichkina, bo‘yi ikki yarim metr atrofida edi. Bizning hayvonot bog‘imizda 4 yil yashadi, shu vaqt davomida bo‘yi 5 metrga yetgandi. Jirafa Afrika hayvoni, issiq iqlimga moslashgan. O‘tgan yillarda qish mo‘tadil keldi, qattiq sovuq bo‘lmadi. Shuning uchun yaxshi yurgandi. Bu yilgi anomal sovuq paytida shamollab qolgan ekan. O‘zi xonasi issiq, biroq kichikroq, 5 metrga 6 metr o‘lchamda edi. Aylanib yurishiga xona torlik qilgani uchun bir joyda ko‘p turib qolsa oyog‘i charchab yotib olardi. Shuning uchun tez-tez tashqariga shamollatishga olib chiqib turardik.

Jirafaning yozgi joyi keng. Sovuq kunlari tashqariga olib chiqqanimizda shamollab qolgan ekan, shu sabab nobud bo‘libdi. Buni o‘zimiz ham keyin, mutaxassislar kelib, jasadini tekshirganda bildik. Veterinariya va chorvachilikni rivojlantirish boshqarmasidan mutaxassislar kelib jasadini so‘yib tekshirishdi. Hech qanday yuqumli kasallik yoki zaharlanish alomatlari aniqlanmadi. Bu haqda mutaxassislar xulosasi bor. Uning o‘limiga ochlik sabab bo‘lmagan. Oziq-ovqat taʼminoti yaxshi edi.

Hayvonot bog‘ida anomal sovuq taʼsirida boshqa birorta qush yoki jonzot nobud bo‘lgani yo‘q. Hamma hayvonlar issiq joyda saqlanadi. Yangi jirafa olib kelish niyatimiz bor. Bundan avval unga kattaroq – 25 metr atrofida xona tayyorlashimiz kerak. O‘zi umuman hayvonot bog‘ini kengaytirish va hayvonlar sonini ko‘paytirishni rejalashtirganmiz. Prezidentimizning Farg‘ona viloyatiga tashrifi davomida ham bu masala ko‘tarilgan, hayvonot bog‘ini rekonstruksiya qilishga va uni yangi jonzotlar bilan boyitishga 15 milliard so‘m mablag‘ ajratilishi belgilangan”, — dedi Tursunali Mamajonov.

Maʼlumot uchun, Farg‘ona hayvonot bog‘i 2016-yilning 30-dekabr kuni viloyat markazida faoliyat boshlagan. Umumiy maydoni qariyb 4 gektarni tashkil etuvchi hayvonot bog‘ida hozirda 140 tur – 500 dan ortiq hayvon saqlanadi. 64 nafar xodim mehnat qiladi.