Дунёнинг энг бадавлат ва машҳур одамлари ўз карьерасини дабдаба билан бошламаган — улар тунни кўчада ўз машиналарида ёки дўстларининг диванларида ухлаб ўтказган. Шунга қарамай, «Оскар», «Гремми» ва «Эмми» ғолиблари ўзларининг ачинарли ўтмишларини енгишга муваффақ бўлди. Harper’s Bazaar Kazakhstan нашри болалиги қашшоқликда ўтган, аммо вақт ўтиб, муваффақиятга эришган машҳурларнинг ҳикояси билан бўлишди.
Мила Кунис
Мила 7 ёшида Украинадан оиласи билан АҚШга кўчиб келган. Интервьюлардан бирида актриса оиласи чўнтагида 250 доллар билан ватанини тарк этганини айтиб ўтганди. Куниснинг айтишича, у ва унинг турмуш ўртоғи Эштон Катчер ўз фарзандларини меҳнатнинг қадри билан тарбияламоқчи. «Иккаламиз ҳам қашшоқликда ўсганмиз ва ҳар бир ишлаган долларнинг қийматини яхши биламиз. Бизга ҳеч нарса осоликча берилмаган», — дейди актриса.
Селена Гомес
Селена Техасда 16 ёшида дунёга келтирган ёлғиз она томонидан тарбияланган. Унинг оиласи кўпинча молиявий қийинчиликларга дуч келган. 2011 йилда хонанда берган интервьюсида онаси бир вақтнинг ўзида бир нечта жойда ишлаб, оиласини боқиш учун курашганини маълум қилган. Айнан қашшоқликда ўтган болалик қизга ҳозирда бутун дунё бўйлаб миллионлаб мухлисларни ҳайратга соладиган юлдуз бўлишга ёрдам берди.
Эминем
Отаси оилани тарк этгандан сўнг бўлажак рэпер ва онаси доимий равишда штатдан штатга кўчиб яшади. Эминем 9-синфда ёмон баҳолар туфайли мактабни ташлаб кетди. 1996 йилда ўзининг дебют альбомини чиқаргандан сўнг ҳип-ҳоп юлдузи Др. Дре билан шартнома имзолади. Кейинчалик бутун дунёда машҳурликка эришди.
Леонардо Ди Каприо
«Оскар» совриндори кўп йиллар давомида Лос-Анжелеснинг энг қашшоқ ҳудудида ўсганини, у ерда тез-тез жисмоний зўравонлик ва гиёҳванд моддалар таъсирига дучор бўлганини очиқ айтди. Леонардо Ди Каприо уни кино қутқарганини кўп такрорлайди. Она ўғлининг актёрликка интилишларини ўз вақтида англаб етди ва бола учун бир нечта кастинглар топиб, агентликларга мурожаат қилди. 15 ёшида у Роберт Де Ниро билан «Бу боланинг ҳаёти» фильмида рол ўйнади. Ўшандан кейин Леонардо Ди Каприо исмли йигитнинг ҳаёти кескин ўзгарди ва унинг актёрлик карьераси гуллаб яшнади.
Жастин Бибер
Машҳур қўшиқчи Канаданинг Онтарио шаҳрида ёлғиз она Патти Маллетт томонидан тарбияланган. Болалигида Жастин кўп вақтини ёлғиз ўтказган, чунки онаси оиласини боқиш учун кўплаб кам маошли ишларда ишлаган. Мухлисларга маълумки, бўлажак хонанда 2008 йилда YouTube’да менежер Скутер Браун томонидан кашф этилган. Ўшандан кейин Жастин энг нуфузли мусиқачилардан бирига айланди.
Сара Жессика Паркер
Актриса Манхэттенда саккиз фарзандли катта оилада ўсган. Унинг онаси ва юк машинаси ҳайдовчиси бўлиб ишлаган ўгай отаси тирик қолиш ва оилани боқиш учун курашган. Голливуд юлдузи болалик чоғида улар тез-тез электр энергиясини тўламаганликлари учун ўчириб қўйишганини, оилада туғилган кунлар нишонланмаганини ва шунинг учун Сарада ҳали ҳам пулни тежаш одати борлигини эслайди. Бироқ ота-она ҳар доим қизига ишонч билдирган ва қўллаб-қувватлаган.
Опра Уинфри
Агар машаққатли меҳнат муваффақият олиб келишини исботлаш керак бўлса, унда Опра мукаммал намунадир. Ток-шоу бошловчиси ёлғиз она қўлида тарбия топган ва болалигини асосан бувиси билан Милуокининг қишлоғида ўтказган. Кейин кичик оила ижтимоий таъминотга таянди. Ҳозирда Уинфрининг бойлиги 2,7 миллиард долларга баҳоланмоқда.
Жим Керри
Голливуднинг энг буюк комик актёрларидан бири ҳар доим ҳам кулиб яшамаган. Канадалик актёр отаси ишдан бўшатилганда ўсмирлик даврида мактабни ташлаб кетишга мажбур бўлган ва ота-онасига ёрдам бериш учун фаррош, қўриқчи бўлиб ишлаган. Оила охир-оқибат уйидан айрилганида, Жим, унинг ота-онаси, укаси ва опа-сингиллари фургонда яшашган. Қандайдир тарзда ўзларини боқиш учун бутун оила яна фабрикага ишлашга кетади. Керри бутун болалигида акаси ва опаси билан бирга у ерда ҳожатхоналар ва полларни ювган.
Жоан Роулинг
Роулингнинг отаси Rolls-Royce заводида муҳандис бўлиб ишлаганига қарамай, оила ҳеч қачон ҳашаматга чўмилмаган. Гарри Поттер китоблари, фильмлари ва тегишли маҳсулотлардан миллиардлаб даромад олган ёзувчи бир вақтлар ижтимоий ҳимояга таянган ва депрессияга қарши курашган ёлғиз она эди. Жоан ҳаётининг қийин даврида Эдинбургдаги кафеларда Гарри Поттер ҳақидаги машҳур китобларнинг қўлёзмаларини ёзган ва ҳозирда бутун Британиядаги энг бадавлат аёллардан бири ҳисобланади.
Жей Зи
Рэпер ва тадбиркор Жей Зи ўз фаолиятини Бруклинда бошлаган ва у ерда ёлғиз она томонидан тарбияланган. У мактабни ташлаб, гиёҳванд моддаларни сотишни бошлади, бунинг учун у 16 ёшида ҳибсга олинди. Энди рэпер дунёдаги энг муваффақиятли мусиқа магнатларидан бирига айланди, тунги клуб ва Бруклин Нец баскетбол жамоасининг эгаси. У Бейонсе билан турмуш қурган ва уч нафар фарзанди бор.
Арнольд Шварценеггер
Австриялик актёр, сиёсатчи ва бодибилдер болалигини отанинг қаттиқ тарбияси остида ўтказди. Натижада Калифорниянинг собиқ губернатори 1971 йилда автоҳалокатга учраган отаси ва укасининг дафн маросимида қатнашишдан бош тортди. Вақт ўтиб, Шварценеггер кинода ўз ўрнига эга бўлди ва охир-оқибат АҚШга кўчиб келди.
Том Круз
Том Крузнинг бир вақтлар қашшоқликда яшаганини тасаввур қилиш қийин. Бўлажак актёр Нью-Йоркнинг Сиракуз шаҳрида ўсган оддий ёш йигит эди. У зўравон ота қўлида катта бўлган. Крузнинг онаси у 11 ёшида оилани тарк этган, отаси эса кўп ўтмай вафот этган. Етим ва қашшоқ қолган Круз шоу-бизнеснинг энг тубидан бошлаб, ном қозонишга муваффақ бўлди. Бугунги кунда у энг кўп маош оладиган Голливуд юлдузларидан бири бўлиб, унинг бойлиги 270 миллион долларга баҳоланмоқда.
50 сент
Рэпер 50 сент Нью-Йоркнинг Квинс ҳудудида яшаган. Болалигида у қашшоқликни, ижтимоий тенгсизликни кўрган, бешик ўрнига ўқ овозларини эшитган. Ижрочи ёшлигида 80 йиллардаги крек эпидемияси пайтида гиёҳванд моддаларга қарам бўлиб қолди. 2000 йилда рэпер ўлим ёқасида қолди, у гиёҳвандлик бизнесини тарк этишга уринганидан кейин 9 марта отиб ташланди. 2002 йилда Эминем билан учрашганида унинг ҳаёти кескин ўзгарди. У дунёдаги энг машҳур рэперлардан бирига айланишга муваффақ бўлди.
Холли Берри
Нотинч оилада ўсган Берри отасининг ҳақоратига ҳар куни гувоҳ бўлганини тез-тез эслайди. Кейин ота-онаси у тўрт ёшга тўлганда ажрашди. Шундан сўнг, Холли ва унинг катта синглиси Огайо штатида онаси қўлида тарбияланган, у ерда Берри 1986 йилда «Огайо гўзали» танловида ғолиб чиқишдан олдин ўрта мактабни имтиёзли диплом билан тугатган. Ушбу муваффақиятдан сўнг актриса моделлик бизнесига кириш учун Нью-Йоркка кўчиб ўтди ва 1989 йилда у ҳатто уйсизлар бошпанасида яшашга мажбур бўлди. Аммо ҳозир ҳаммаси узоқ ўтмишда қолди.
Деми Мур
Машҳур актриса пиёниста онаси (реабилитациядан чиққанидан кейин у билан алоқаларини бутунлай узди) ва ўз жонига қасд қилган ўгай отаси билан катта бўлган. У тиришқоқ ўқувчи эди, лекин охир-оқибат ўрта мактабни ташлаб, қарз йиғиш агентлигига ишга кирди. Шу билан бир қаторда, қиз ўзини моделлик ва актрисаликда синаб кўрди ва «Арвоҳ» фильмида суратга тушгандан кейин муваффақиятга эришди.
Силвестр Сталлоне
Силвестр Сталлоне ва унинг укаси Фрэнкнинг болалиги оғир кечган. Ўғил болалар ота-оналарининг душманлик муносабати туфайли доимий равишда бир оиладан иккинчисига ўтиб яшаган. Охир-оқибат улар Филаделфияга келди ва у ерда онаси ва унинг иккинчи эри билан яшади. У актёрлик билан шуғулланиш учун Нью-Йоркка кўчиб ўтишга қарор қилганида, кун кечириш учун ғалати ишларни бажаришга мажбур бўлди. У ҳатто ҳайвонот боғидаги шер қафасларини ҳам тозалаган.
Изоҳ (0)