“Қаттиққўл хоним”, “Жулия”, “Примадонна” ва бошқа таниқли фильмлар юлдузи Мерил Стрип ва актёр Мартин Шорт турмуш қуришга тайёргарлик кўришмоқда. Бу ҳақда New Idea нашрига жуфтликка яқин бўлган инсонлар хабар берди.
Нашрда айтилишича, Стрип ва Шорт Жанубий Калифорнияда ёпиқ тўй маросими ўтказиш учун қулай жой изламоқда. Жуфтлик бир нечта вариантни, жумладан, Санта Барбара атрофидаги манзарали ҳудудлар, улар тез-тез ташриф буюрадиган шароб тайёрловчилар тумани ёки Монтесито яқинидаги Ritz-Carlton Bacara курорти каби ҳудудларни кўриб чиқмоқда:
Ritz-Carlton Bacara бўлажак тўй учун ажойиб жой, қолаверса, бу курорт тўлиқ ёпиқ ҳудуддан иборат. Бу жиҳат Мартин ва Мерил учун катта афзаллик беради, чунки улар иккиси ҳам никоҳ маросими оммадан узоқ ерда бўлиб ўтишини истайди. Фикримизча, бу маросим катта байрам тарзида бўлиб ўтади, дейилади манбада.
Тўйга камида 50 нафар меҳмон таклиф қилиниши режалаштирилган. Улар орасида шоу-бизнес олами вакиллари: Том Ҳэнкс, Рита Уилсон, Стив Мартин, Селена Гомес, Шер, Виола Дэвис ва бошқалар бор.
Фото: People
Мерил Стрип ва Мартин Шорт “Бинодаги қотиллик” сериалининг учинчи мавсумида яқиндан танишган, улар фильмда ошиқлар образини гавдалантирган. Жуфтлик тез-тез папарацси кадрларига тушса-да, улар муносабатлари ҳақида сукут сақлайди ва фақат дўст эканлигини таъкидлайди.
Маълумот учун, Мерил Стрип — америкалик актриса, кино ва театр соҳаси юлдузи. У 1949 йил 22 июнда Нью Жерси штатининг Саммиц шаҳрида туғилган. Стрип 1970 йилларда театрда фаолият бошлаган, кейинчалик кино саноатига ўтган. У кўплаб муваффақиятли фильмларда рол ўйнаган ва 3 карра “Оскар” мукофотини қўлга киритган. Шунингдек, актриса 8 та “Олтин Глобус” ва бошқа кўплаб йирик мукофотлар билан тақдирланган.
1978 йилда турмуш қурган Мерил Стрип ва Дон Гаммерларнинг муносабати узоқ йиллар давомида Голливуднинг энг намунали оиласи сифатида тан олинган эди. Ушбу оилада тўрт фарзанд: Генри, Меми, Грэйс ва Луиза дунёга келди. Аммо 2023 йил октябрь ойида эр-хотин олти йилдан ортиқ вақт давомида алоҳида яшаб келгани маълум бўлди. Шунга қарамай, актриса Стрип ажрашгандан кейин ҳам собиқ турмуш ўртоғига ҳурмат кўрсатиб, никоҳ узугини тақишда давом этган.
Изоҳ (0)