Ғарбий Хитойда археологлар кутилмаган ташқи кўринишга эга бўлган ўнлаб оқ танли, малла сочли, баланд бўйли мумиёларни топдилар. Уларнинг барчаси бундан минг йиллар олдин Такламакон чўлида, Тарим дарёси ҳавзасида дафн этилган. Бу ҳақда “РИА Новости” хабар бермоқда.
Баъзи тадқиқотчиларнинг фикрича, бу топилмалар қадимги европоид халқларининг милоддан анча олдин Осиё қитъаси марказида мавжуд бўлганлигини кўрсатиши мумкин.
Ҳозирга келиб 300 дан ортиқ Тарим мумиёлари маълум. Энг машҳури - Лоулан гўзали, бўйи 180 сантиметр бўлган тўқ сариқ сочли аёл бўлиб, у тахминан 3800 йил олдин яшаган. Унинг танаси мукаммал ҳолатда сақланиб қолган, шунингдек, унга тегишли нарсалар: тароқ, сават ва бўйра ҳам топилган.
Яна бир машҳур топилма - Черчен одами: баланд бўйли, оқ сочли, юзида татуировкалари бор ва кўплаб дафн буюмлари билан кўмилган. Унинг ёнидан ҳатто кўзларига кўк тошлар қўйилган чақалоқ мумиёси ҳам топилган.
Бу одамлар ким бўлгани ҳали ҳам номаълум. Тахминлар орасида Марказий Осиёда яшаган сирли халқ — тохарлар ҳам бор. Шунингдек, қадимги ҳинд-европа халқларининг миграциялари ҳақида ҳам фаразлар мавжуд. Баъзи манбаларда, масалан, Рим ёзувчиси Катта Плиний милодий I асрдаёқ Хитой ҳудудида “ўрта бўйдан баланд, зиғир сочли ва кўк кўзли” одамларни тилга олган.
Тарим мумиёларининг номаълум келиб чиқиши қадимги Хитойнинг изоляцияси ҳақидаги аввалги тасаввурларни шубҳа остига қўяди ва маданиятлар ўртасидаги алоқалар ҳақида янги билимлар қатламини очади.
Апрель ойи бошида Хитойда неандертал одамларнинг излари топилгани маълум бўлди. Топилган буюмлар Ғарбий Европага хос услубда ишланган бўлиб, бу ҳам Шарқ илгари ўйланганидек алоҳида бўлмаганини тахмин қилишга асос бўлди.
Изоҳ (0)