Олий Мажлис Сенати раиси Танзила Норбоева Бутунхитой халқ вакиллари мажлиси доимий қўмитаси раиси Чжао Лецзи бошчилигидаги делегация билан учрашув ўтказди. Бу ҳақда Сенат матбуот хизмати хабар берди.
Учрашувда Ўзбекистон-Хитой давлатларининг тарихий муносабатлари қадимдан то бугунга қадар давом этиб келаётгани, айниқса, икки давлат етакчиларининг дўстона алоқалари ва қатъий сиёсий иродаси туфайли ушбу ҳамкорлик мустаҳкамланаётгани алоҳида эътироф этилди.
Томонлар икки мамлакат ўртасидаги ўзаро муносабатларда парламентларнинг тутган ўрни юксак эканлиги, уни амалий мазмун бойитиш лозимлиги таъкидланди. Бунда парламент дўстлик гуруҳлари ишини фаоллаштириш, ўзаро ташрифларни амалга ошириш, қўмиталар ўртасида яқин муносабатларни йўлга қўйиш, қонун ижодкорлиги ва парламент назорати йўналишларида тажриба алмашиш муҳимлиги қайд этилди.
Ўзбекистон вилоятлари ва Хитойнинг провинциялари маҳаллий Кенгашлари ўртасидаги алоқаларни ўрнатиш, ҳудудий ҳамкорликни кучайтириш бўйича билдирилган таклифлар меҳмонлар томонидан қўллаб-қувватланди.
Музокаралар чоғида Ўзбекистон ва Хитой ҳудудлари ўртасида нафақат савдо-иқтисодий балки, маданий-гуманитар, илм-фан, таълим йўналишларида ҳам ҳамкорликни янада чуқурлаштириш лозимлиги таъкидланди.
Учрашув якунида икки томонлама муносабатларни ҳуқуқий жиҳатдан мустаҳкамлаш, халқаро парламент тузилмалари доирасида ҳамкорликни ривожлантириш, ўзаро ташаббусларини доимий қўллаб-қувватлашга келишиб олинди.
Изоҳ (0)