Ўзбекистонда Leapmotor автомобиллари импорти чекланди

Ўзбекистонда Leapmotor енгил автомобилларини сертификатлаш вақтинча тўхтатилди. Техник жиҳатдан тартибга солиш агентлиги сертификациялаш органларига огоҳлантириш хати юборгани маълум бўлди.

Ушбу бренд автомашиналарига чеклов қўйилишига Leapmotor C16 автомобилида аниқланган камчилик сабаб бўлган. Leapmotor компанияси томонидан ишлаб чиқарилган М1 тоифадаги Leapmotor товар белгили C16 русумли (VIN рақами LFZЗ93АN96RD091431) енгил транспорт воситаси мувофиқлигини баҳолаш натижасида регламентнинг 3-илова 44-бандида белгиланган талабга номувофиқлиги аниқланган.

Мазкур номувофиқлик автотранспорт воситасидан фойдаланишда унинг электроникаси ёки бошқа қурилмаларидан фойдаланишда муаммоларга, айрим ҳолларда тегишли тизимларнинг ишдан чиқишига олиб келиши айтилган.

Номувофиқлик Leapmotor компанияси томонидан бартараф этилгунга қадар М1 тоифадаги Leapmotor товар белгили автотранспорт воситаларини сертификатлаштириш юзасидан аризаларни қабул қилиш тўхтатилади.

Макроиқтисодий ва ҳудудий тадқиқотлар институти мутахассислари томонидан 2025 йилнинг январь ойида иккиламчи бозордаги автомобиллар нархи таҳлил қилинган эди. 

Электромобиллар нархи

Мазкур даврда кўп фойдаланилган BYD E2: (15 250 доллар) ва Yuan Up (20 минг доллар) электромобиллари нархи ўзгармаган бўлса, бошқа электромобиллар ўртача нархларида арзонлаш кузатилди:

• BYD E2: янги - 1,8 фоизга (17 100 доллардан 16 800 долларга), ўртача фойдаланилган - 2,9 фоизга (15 970 доллардан 15 500 долларга);
• BYD Han: янги - 0,9 фоизга (32 500 доллардан 32 200 долларга), кўп фойдаланилган - 2,9 фоизга (31 750 доллардан 31 250 долларга);
• BYD Song Plus DM-i Champion: янги - 0,3 фоизга (29 100 доллардан 29 минг долларга), ўртача фойдаланилган - 1,1 фоизга (27 200 доллардан 26 900 долларга), кўп фойдаланилган - 2,8 фоизга (24 999 доллардан 24 300 долларга);
• BYD Song Plus EV Champion: янги - 1,4 фоизга (28 500 доллардан 28 090 долларга), ўртача фойдаланилган - 3,6 фоизга (26 600 доллардан 25 650 долларга), кўп фойдаланилган - 2,9 фоизга (24 050 доллардан 23 350 долларга).

Хорижий автомобиллар нархи

• Elantra: ўртача фойдаланилган - 2,3 фоизга (21 500 доллардан 21 минг долларга); кўп фойдаланилган - 4,8 фоизга (21 минг доллардан 19 995 долларга);
• Tucson: кам фойдаланилган - 1,5 фоизга (33 500 доллардан 33 минг долларга), ўртача фойдаланилган - 0,8 фоизга (31 750 доллардан 31 500 долларга); кўп фойдаланилган - 2 фоизга (25 500 доллардан 25 минг долларга);
• Sportage: кам фойдаланилган - 1,4 фоизга (29 минг доллардан 28 600 долларга), ўртача фойдаланилган - 1,8 фоизга (27 500 доллардан 27 минг долларга); 
• Seltos: кўп фойдаланилган - 2,1 фоизга (23 500 доллардан 23 минг долларга) арзонлаган.

Автомобиль бозори қандай ҳолатда?

Ноябрь ойида 2024 йилнинг III чорагида Ўзбекистон автомобиль бозорида фаоллик даражаси ошган бўлса-да, 2023 йилги даражада эмаслиги ҳақида хабар берилганди. Хусусан, июль сентябрь ойларида давлат рўйхатидан ўтказилган автомобиллар сони 352,8 мингтани ташкил қилиб, II-чоракдагига нисбатан 76,8 мингтага (27,8 фоизга) кўпайди. Бироқ, бу кўрсаткич 2023 йилнинг мос давридагига нисбатан 19,9 фоиз кам.

Декабрь ойи аввалида Lacetti, Nexia, Spark каби оммабоп автомобиллар нархлари пасайгани ҳақида хабар берилган.

Ўзбекистонда 2024 йил октябрида автомобиль бозорида сотувлар яна пасайгани айтилган эди. Октябрь ойида автотранспорт воситаларининг савдоси 102,3 минг донани ташкил этди, бу ўтган ойга нисбатан 7 фоизга кам. Йиллик кўрсаткичда эса пасайиш — 44 фоиздан кўпроқ.