Жорий йил январь ойида мамлакатга импорт қилинган енгил автомобиллар сони 5,6 бараварга қисқарди. Бу ҳақда Божхона қўмитаси маълум қилди.
Қайд этилишича, ўтган ой давомида Ўзбекистонга умумий қиймати 31 миллион долларлик 1796 дона енгил автомобиль импорт қилинган. Шундан 1159 донаси (21,6 млн доллар) бензинда ҳаракатланувчи транспорт воситалари ҳисобланади. Қолган 613 таси электромобиль (8,4 млн доллар), 24 донаси гибридлар (950 минг доллар).
Таққослаш учун, 2024 йил январда мамлакатга жами қиймати 221,4 млн долларлик 10152 та енгил автомобиль импорт қилинганди. Шундан 7810 донаси бензинда (157,4 млн доллар), 1584 таси электрда (44,2 млн доллар) ҳаракатланувчи, 750 донаси эса гибрид мобеллар (15,5 млн доллар) бўлган.
Умуман олганда, 2024 йил давомида 1,27 миллиард долларлик 74505 дона енгил автомобиль импорт қилинган. Шундан қарийб 17480 таси гибрид (339,3 млн доллар), 24091 таси электромобиль (224,7 млн доллар) эди. 2023 йилдаги енгил автмобиллар импорти ўтган йилдагиданда юқори бўлган. Яъни йил мобайнида хориждан қарийб 1,9 миллиард долларлик 80235 дона енгил автомобиль харид қилинган.
Импорт нега қисқарди?
Таҳлилларга кўра, импорт қисқаришига Пискент туманидаги импорт автомобиллар учун синов полигони ишга тушгани таъсир қилган бўлиши мумкин. Полигон қуввати Ўзбекистонга аввалгидек кўп автомобиль киритиш учун етарли эмас. Бу табиий равишда импорт жараёнини мураккаблаштиради, оқбатда автомобиллар нархини оширади.
2024 йил 1 ноябрдан Ўзбекистонга импорт қилинадиган транспорт воситалари Пискент полигонида синовдан ўтказила бошланган. Бунга сабаб сифатида ҳаракат хавфсизлигини кучайтириш ва мамлакатга олиб кирилаётган транспорт воситалари сифатини яхшилашга қаратилгани айтилган.
Январь ойида импорт автомобилларини техник кўрикдан ўтказувчи автополигон ўзининг салбий оқибатларини кўрсатишда давом этган ва импорт олдинги ойлардагига нисбатан тезроқ қисқаришни бошлаган. Май ойидан эса қўшимча чекловлар натижасида автомобиллар импортининг қисқариши янада тезлашиши турган гап. Бу эса ўз навбатида бир мунча «совиб қолган” автомобиль бозорида нархлар ошишига олиб келади, дея фикр билдирди иқтисодчи Миркомил Холбоев.
Аввалроқ BYD Uzbekistan Factory қўшма корхонаси ҳукуматдан электромобилларнинг тартибсиз импортини чеклашни сўраганди. Ўшанда жамоатчилик фаоллари импортни чеклаш рақобат йўқолишига олиб келишидан хавотир билдирган. Айрим иқтисодчилар фикрича, Ўзбекистонда янги автомобиль заводлари очилиши автомашиналар нархи пасайишига олиб келмайди.
Изоҳ (0)