Маҳаллий (Ўзб)

Ўзбекистон иккиламчи автомобиль бозорида январь ойида пасайиш давом этди – таҳлил

Макроиқтисодий ва ҳудудий тадқиқотлар институти мутахассислари томонидан 2025 йилнинг январь ойида иккиламчи бозордаги автомобиллар нархи таҳлил қилинди.

Маҳаллий оммабоп автомобиллар нархи

Январь ойида маҳаллий оммабоп автомобиллар нархи 2024 йилнинг декабрь ойидагига нисбатан арзонлашди.

Фото: Макроиқтисодий ва ҳудудий тадқиқотлар институти

Хусусан:

Onix: кам фойдаланилган - 2,4 фоизга (14 350 доллардан 14 минг долларга), кўп фойдаланилган - 1,5 фоизга (13 минг доллардан 12 800 долларга);
Lacetti: кам фойдаланилган - 0,7 фоизга (15 минг доллардан 14 900 долларга), ўртача фойдаланилган - 1,4 фоизга (14 500 доллардан 14 300 долларга), кўп фойдаланилган - 1,7 фоизга (13 327 доллардан 13 095 долларга);
Cobalt: кам фойдаланилган - 1,4 фоизга (12 901 доллардан 12 725 долларга), ўртача фойдаланилган - 2,4 фоизга (12 300 доллардан 12 минг долларга), кўп фойдаланилган - 1,7 фоизга (11 700 доллардан 11 500 долларга);
Nexia: ўртача фойдаланилган - 1,8 фоизга (11 400 доллардан 11 200 долларга); кўп фойдаланилган - (10 500 доллардан 10 465 долларга);
Spark: ўртача фойдаланилган - 1 фоизга (10 300 доллардан 10 200 долларга), кўп фойдаланилган - 1,1 фоизга (9 300 доллардан 9 200 долларга);
Damas: кам фойдаланилган - 0,5 фоизга (8 135 доллардан 8 098 долларга), ўртача фойдаланилган - 1,4 фоизга (8 минг доллардан 7 886 долларга), кўп фойдаланилган - 4,1 фоизга (7 300 доллардан 7 минг долларга) арзонлашган.

Маҳаллий люкс автомобиллар нархи

Кам фойдаланилган Equinox ва Malibu автомобилларининг ўртача нархларида ошиш кузатилган бўлса-да, ўртача ва кўп фойдаланилганлари учун нархлар арзонлашишда давом этди.

Хусусан:

Malibu: ўртача фойдаланилган - 2,1 фоизга (29 100 доллардан 28 500 долларга), кўп фойдаланилган - 1,6 фоизга (25 минг доллардан 24 600 долларга) арзонлаган бўлса, кам фойдаланилган учун ўртача нарх 1,2 фоизга (29 650 доллардан 30 минг долларга) ошди;
Equinox: ўртача фойдаланилган - 1,6 фоизга (30 500 доллардан 30 минг долларга) арзонлаб, кўп фойдаланилгани учун ўртача нарх (26 500 доллар) ўзгаришсиз қолган бўлса, кам фойдаланилгани 0,9 фоизга (34 минг доллардан 34 308 долларга) ошган;
Tracker: кам фойдаланилган - 1,6 фоизга (18 700 доллардан 18 403 долларга), ўртача фойдаланилган - 2,3 фоизга (17 700 доллардан 17 300 долларга), кўп фойдаланилган - 2,9 фоизга (17 минг доллардан 16 500 долларга) арзонлашган.

Электромобиллар нархи

Мазкур даврда кўп фойдаланилган BYD E2: (15 250 доллар) ва Yuan Up (20 минг доллар) электромобиллари нархи ўзгармаган бўлса, бошқа электромобиллар ўртача нархларида арзонлаш кузатилди:

BYD Э2: янги - 1,8 фоизга (17 100 доллардан 16 800 долларга), ўртача фойдаланилган - 2,9 фоизга (15 970 доллардан 15 500 долларга);
BYD Han: янги - 0,9 фоизга (32 500 доллардан 32 200 долларга), кўп фойдаланилган - 2,9 фоизга (31 750 доллардан 31 250 долларга);
BYD Song Plus DM-i Champion: янги - 0,3 фоизга (29 100 доллардан 29 минг долларга), ўртача фойдаланилган - 1,1 фоизга (27 200 доллардан 26 900 долларга), кўп фойдаланилган - 2,8 фоизга (24 999 доллардан 24 300 долларга);
BYD Song Plus EV Champion: янги - 1,4 фоизга (28 500 доллардан 28 090 долларга), ўртача фойдаланилган - 3,6 фоизга (26 600 доллардан 25 650 долларга), кўп фойдаланилган - 2,9 фоизга (24 050 доллардан 23 350 долларга).

Хорижий автомобиллар нархи

Elantra: ўртача фойдаланилган - 2,3 фоизга (21 500 доллардан 21 минг долларга); кўп фойдаланилган - 4,8 фоизга (21 минг доллардан 19 995 долларга);
Tucson: кам фойдаланилган - 1,5 фоизга (33 500 доллардан 33 минг долларга), ўртача фойдаланилган - 0,8 фоизга (31 750 доллардан 31 500 долларга); кўп фойдаланилган - 2 фоизга (25 500 доллардан 25 минг долларга);
Sportage: кам фойдаланилган - 1,4 фоизга (29 минг доллардан 28 600 долларга), ўртача фойдаланилган - 1,8 фоизга (27 500 доллардан 27 минг долларга);
Seltos: кўп фойдаланилган - 2,1 фоизга (23 500 доллардан 23 минг долларга) арзонлаган.

Электромобиль бозори ҳақида

Аввалроқ Ўзбекистонда электромобиллар учун утилизация йиғими оширилиши ҳақида хабар берилганди.

2019 йилда Ўзбекистонга олиб кирилаётган электромобиллар божхона, акциз ва автотранспорт солиқларидан озод қилинган. 2021 йилнинг ноябрида ЙҲХББ электромобиллар учун “яшил” давлат рақамлари беришни бошлади.

Президентнинг 2024 йилдаги қарорига кўра, Ўзбекистонда электромобиль ва гибрид автомобиллар ишлаб чиқариш қуввати босқичма-босқич йилига 500 минг донагача оширилади.

9 ой давомида бензинда ҳаракатланадиган автомобиллар импорти 28 фоизга камайгани ҳақида хабар берилганди. Бензин ва электрда (гибрид) ҳаракатланувчи енгил автомобиллар импорти жорий йилда 11 минг 425 дона импорт қилинган бўлса, бу ўтган йилнинг мос даврига нисбатан 49 фоизга (3 минг 775 та) ортган.

Статистика агентлиги маълумотларига кўра, Ўзбекистон 2024 йилнинг саккиз ойи давомида хориждан қиймати 166,8 миллион долларлик 12 913 та электромобиль импорт қилинган. Бу ўтган ойга нисбатан 2 минг 371 тага кўп. 2022 йилнинг мос даври билан солиштирилганда эса қарийб 6 баробарга ошган.

Иқтисодий тадқиқотлар ва ислоҳотлар маркази берган маълумотга кўра, 2024 йил сентябрида 4,24 мингта электромобиллар сотилган, август ойида эса 1,7 минг дона сотилган.

Автомобиль бозори қандай ҳолатда?

Ноябрь ойида 2024 йилнинг III чорагида Ўзбекистон автомобиль бозорида фаоллик даражаси ошган бўлса-да, 2023 йилги даражада эмаслиги ҳақида хабар берилганди. Хусусан, июль сентябрь ойларида давлат рўйхатидан ўтказилган автомобиллар сони 352,8 мингтани ташкил қилиб, II-чоракдагига нисбатан 76,8 мингтага (27,8 фоизга) кўпайди. Бироқ, бу кўрсаткич 2023 йилнинг мос давридагига нисбатан 19,9 фоиз кам.

Декабрь ойи аввалида Lacetti, Nexia, Spark каби оммабоп автомобиллар нархлари пасайгани ҳақида хабар берилган.

Ўзбекистонда 2024 йил октябрида автомобиль бозорида сотувлар яна пасайгани айтилган эди. Октябрь ойида автотранспорт воситаларининг савдоси 102,3 минг донани ташкил этди, бу ўтган ойга нисбатан 7 фоизга кам. Йиллик кўрсаткичда эса пасайиш — 44 фоиздан кўпроқ.