Ўзбекистон 2024 йилда хориждан қиймати 224,8 млн долларга тенг бўлган 24 095 та электромобиль импорт қилган. Бу ҳақда Статистика агентлиги хабар берди.
Энг кўп электромобиль импорт қилган давлатлар рейтингида эса Хитой пешқадам — 23 982 та. Кейинги ўринда эса Қозоғистон — 51 та.
Бундан ташқари, Гонконг (17 та), Германия (15 та), БАА (13 та) ва АҚШ (10 та)дан электромобиллар олиб келинган.
Аввалроқ Ўзбекистонда электромобиллар учун утилизация йиғими оширилиши ҳақида хабар берилганди.
2025 йил 1 майдан бошлаб:
- ишлаб чиқарилган муддатидан бошлаб 3 йилдан ортиқ бўлмаган электромобиллар учун БҲМнинг 120 баравари (45 млн сўм);
- ишлаб чиқарилган муддатидан бошлаб 3 йилдан ортиқ бўлган электромобиллар учун БҲМнинг 210 баравари (78 млн 750 минг сўм) этиб белгиланади.
Электромобиль бозори ҳақида
Ўзбекистонда ўтган етти йилда электромобиллар импорти 10 бараварга ошгани хабар қилинган эди. 2019 йилда Ўзбекистонга олиб кирилаётган электромобиллар божхона, акциз ва автотранспорт солиқларидан озод қилинган. 2021 йилнинг ноябрида ЙҲХББ электромобиллар учун “яшил” давлат рақамлари беришни бошлади.
Президентнинг 2024 йилдаги қарорига кўра, Ўзбекистонда электромобиль ва гибрид автомобиллар ишлаб чиқариш қуввати босқичма-босқич йилига 500 минг донагача оширилади.
Изоҳ (0)