НАСА космик кемаси Қуёшга инсон томонидан яратилган бошқа ҳар қандай объектга қараганда яқинроқ бориб, янги рекорд ўрнатишга тайёрланмоқда.
“Паркер” қуёш зонди 2018 йилда Қуёшни яқин масофадан ўрганиш учун ишга туширилган. У ўз экспедицияси давомида аллақачон Қуёш тожини — ёритгичнинг ташқи атмосферасини учиб ўтган бўлиб, бу фақат тўлиқ қуёш тутилиши пайтида кўринадиган ҳодисадир.
Ҳозирда зонд янги босқични босиб ўтишга, хусусан, Қуёшга рекорд масофада яқинлашишга тайёрланмоқда: 24 декабрь куни аппарат юлдуз сиртидан атиги 6 миллион километр масофада учиб ўтиб, қизиган қуёш атмосферасига шўнғиши кутилмоқда.
Бироқ зонд ушбу экстремал синовдан қандай ўтганини НАСА олимлари бир неча кундан кейингина билишади, чунки яқинлашиш пайтида у Ер билан алоқа зонасидан ташқарида бўлади.
“Паркер” Қуёшга аввалги космик кемадан етти баравар яқинроқ масофага бориши кутилмоқда. Шу билан бирга, у энг тез космик аппаратга айланади: юлдузга яқинлашганда соатига 690 минг километр тезликка эришади. Унинг иссиқлик қалқони 1371°C ҳароратгача чидамли ҳисобланади.
Аппарат сентябргача шундай яқин орбитада қолиб, олимларнинг Қуёш билан боғлиқ иккита жумбоғини ечишларига ёрдам берадиган маълумотларни тўплайди: нима учун унинг тожи юзасидан юз марта иссиқроқ ва қуёш шамоли — юлдуздан чиқадиган кучли зарядланган зарралар оқимини нима таъминлайди.
Изоҳ (0)