Американинг SpaceX компанияси 3 мартда синовдан ўтказилган Starship космик кемаси билан алоқа йўқолганини маълум қилди. Бу ҳақда Deutsche Welle хабар берди.
Ракета ўзининг дастлабки икки синовидан анча узоқроққа учишга муваффақ бўлган. АҚШ Миллий аэронавтика ва фазони тадқиқ қилиш бошқармаси (НАСА) раҳбари Билл Нельсон SpaceX компаниясини табриклаб, синов парвозини муваффақиятли деб атаган.
Қайта фойдаланиш мумкин бўлган Starship тизими 70 метрли Super Heavy ва қўшимча двигателларга эга 50 метрлик Starship космик кемасидан иборат. АҚШ жанубидаги Starbase хусусий космодромидан 73 километр баландликда учирилган Starship босқичлари муваффақиятли ажралиб чиққан.
SpaceX маълумотларига кўра, ракета 200 кмдан ортиқ баландликка кўтарила олган. Синов парвози якунида Starship Ҳинд океанига тушиши тахмин қилинган эди, бироқ Ер атмосферасига киргандан сўнг қурилма билан алоқа узилиб қолган.
SpaceX парвозни муваффақиятли деб атаган, чунки Starship биринчи марта бир нечта тизимларни синаб кўришга муваффақ бўлган. Ушбу парвоз давомида SpaceX илк марта 18 минг плиткадан иборат ракета иссиқлик қалқонини синовдан ўтказган.
2023 йилнинг апрель ва ноябрь ойларида Starship’ни ишга тушириш бўйича иккита уриниш муваффақиятсиз якунланган эди. Биринчи синов пайтида ракета парвоздан 3 дақиқа ўтгач, босқичлар ажралмаганидан кейин портлаган. Иккинчи парвозда эса босқичлар ажралиб чиқишга муваффақ бўлган, аммо қисқа вақтдан кейин портлаган.
Starship инсоният тарихидаги энг катта ва энг кучли ракетадир. SpaceX компаниясининг ўзи хабар берганидек, кема одамлар ва юкларни Ер орбитасига, Ой ва Марсга етказа олади. Тизимнинг умумий лойиҳавий юк кўтариш қуввати 150 тоннани ташкил қилади.
Изоҳ (0)