Оқ уй NASA’га Ойда ягона вақт стандартини яратиш бўйича кўрсатма берди

Оқ уй NASA’га Ой ва бошқа самовий жисмлар учун ягона вақт стандартини яратиш вазифасини топширди, чунки АҚШ ой пойгаси кучайиб бораётган бир пайтда космосда халқаро меъёрларни ўрнатишни мақсад қилган. Бу ҳақда Reuters Оқ уйнинг Фан ва технология сиёсати бошқармаси (OSTP) ҳужжатларига таяниб хабар берди.

Агентлик таъкидлаганидек, Ойдаги ягона вақт стандарти Ойдаги космик аппаратлар ва сунъий йўлдошлар учун вақт стандартига айланади, улар учун вазифаларни бажаришда ўта аниқлик муҳим аҳамиятга эга.

Оқ уйга кўра, ягона Ой вақти стандартисиз космик кемалар ўртасида маълумотларни узатиш, шунингдек, Ер, Ой сунъий йўлдошлари, базалар ва астронавтлар ўртасидаги алоқани синхронлаштириш қийин бўлади. Вақтдаги тафовутлар Ойнинг ўзида ва унинг орбитасида картография ва геолокация билан ишлашда хатоларга олиб келиши мумкин.

Ердаги вақт Мувофиқлаштирилган универсал вақт (UTC) асосида тартибга солинади. Ушбу халқаро стандарт Ернинг турли қисмларида жойлашган атом соатларининг кенг тармоғига таянади. Оқ уйнинг Фан ва технология сиёсати бошқармаси ой вақтининг ягона стандарти учун атом соатлари Ойга жойлаштирилиши керак, деб ҳисоблайди.