O‘zbekiston terma jamoasi Jahon chempionati saralashi 8-turi doirasida Eronga qarshi maydonga tushadi. Uchrashuv oldidan o‘tkazilgan matbuot anjumanida futbolchi Abbosbek Fayzullayev ishtirok etib, jurnalistlar savollariga javob qaytardi.
Futbolchi Eronga qarshi bahs qiyin o‘tishi hamda O‘zbekiston Tehronga 3 ochko qo‘lga kiritish uchun kelganini aytdi.
Bizni juda qiyin bahs kutib turibdi. Ikkita teng saviyadagi jamoalar to‘qnash kelmoqda. Biz Tehronga g‘alaba uchun kelganmiz. Nasib qilsa, ertaga bor kuchimiz bilan harakat qilib, 3 ochkoni qo‘lga kiritamiz. Top chempionatlardan bo‘layotgan takliflar? Hozir bu savolga javob beradigan payt emas, sababi ertaga bizni muhim bahs kutib turibdi. Hozir bor e’tiborni terma jamoaga qaratganman, deydi Fayzullayev.
Ma’lumot uchun, hozirda O‘zbekiston terma jamoasi A guruhida 16 ochko bilan 2-o‘rindan joy olgan. 19 ochko to‘plagan Eron esa yetakchilik qilmoqda.
Ushbu jamoalar o‘rtasidagi bahs 25-mart, seshanba kuni Toshkent vaqti bilan 21:00 da boshlanadi.
Izoh (0)