Швеция фуқаролик мудофааси вазири Карл-Оскар Булин мамлакат фуқароларини эҳтимолий урушга тайёр туришга чақирди. Бу ҳақда у “Folk och Forsvar” мудофаа конференциясидаги нутқи чоғида гапирди. Унинг сўзлари Швеция ҳукумати порталида келтирилди.
“Мендан аввал ҳам бу ҳақда кўпчилик гапирган, бироқ буни расмий мақомда, аниқ қилиб айтадиган бўлсам: Швецияда уруш бошланиши мумкин”, — деди вазир шведларни қўрқитмоқчи эмаслигини таъкидлаб.
Вазир ўз нутқида ҳатто Швецияда ҳам тинчлик “доимий” эмаслигини айтди. Булин барча шведларни умумий Швеция мудофаасини яратишга ёрдам беришга чақирди.
Швеция Қуролли кучлари бош қўмондони Микаэль Бюден вазирнинг сўзларига изоҳ берар экан, барча фуқаролар урушга “индивидуал даражада маънавий жиҳатдан тайёрланиши” кераклигини айтди.
“Бу жиддий ва янада ёмонлашиши мумкин, ҳатто биз учун ҳам”, — дея қўшимча қилди Бюден.
НАТО кенгайишига жавобан Россиянинг Украинага кенг кўламли босқини бошланганидан кўп ўтмай, аввал бетарафлик сиёсатига амал қилиб келган Швеция ва Финляндия НАТОга қўшилиш учун ариза берди. 2023 йил апрель ойида Финляндия НАТОга аъзо бўлди, Швеция қачон альянсга қўшилиши ҳозирча номаълум. Туркия узоқ вақтдан буён унинг аъзолигига қарши бўлди, бироқ июль ойида мамлакат расмийлари аризани маъқуллашга ваъда берди. Ҳозирча Туркия парламенти бу борада бирор қарор қабул қилмаган.
Изоҳ (0)