Finlyandiya prezidenti Aleksandr Stubb Sovet-Finlyandiya urushi oqibatida Finlyandiya hududlarining bir qismi Sovet ittifoqiga o‘tgani haqida norozilik bildirdi. U bu haqda Xelsinkida Ukraina prezidenti Vladimir Zelenskiy bilan birgalikda o‘tkazilgan matbuot anjumanida ma’lum qilgan.
“Men davlatchilikning asosi odatda uch ustunda quriladi deb hisoblayman: mustaqillik, suverenitet va hududiy yaxlitlik. Finlyandiya 1944-yilda Stalin bilan tinchlik shartnomasini imzolaganidan so‘ng, bu ustunlardan ikkitasini yo‘qotdi.
Biz mustaqillikni saqlab, amalda Sovet ittifoqining yagona qo‘shnisi bo‘lib qoldik. Ammo biz suverenitetni va qaror qabul qilish huquqini, shuningdek, hududimizning o‘n foizini ham yo‘qotdik. Bu bobom, buvim va otam tug‘ilgan hududlar edi. Shunday ekan agar Ukraina ham xuddi shunday vaziyatga tushishi kerakmi, degan savol tug‘ilsa, mening javobim qat’iyan yo‘q”, dedi Stubb.
1944-yil 19-sentyabrda SSSR va Buyuk Britaniya bir tomondan va Finlyandiya boshqa tomondan 1941-1944-yillardagi Sovet-Finlyandiya urushini amalda yakunlagan Moskva sulhini imzolagan. Moskva sulhining shartlaridan biri 1940-yilgi tinchlik shartnomasiga muvofiq chegarani belgilash edi. Unga ko‘ra Finlyandiya o‘z hududining o‘ndan bir qismini SSSRga berishi va SSSRga qarshi koalitsiyalarda ishtirok etmaslik majburiyatini olishi kerak edi. Shartnomaga muvofiq, Karelia bo‘g‘ozidagi chegara Leningraddan 120-130 kilometrga surilgan. Viborg shahri bilan butun Karelia bo‘g‘ozi, Viborg qo‘ltig‘i va uning orollari, Ladoga ko‘lining g‘arbiy va shimoliy qirg‘oqlari, Fin qo‘ltig‘idagi bir qancha orollar, Ribachiy va Sredniy yarim orollarining bir qismi Sovet ittifoqiga o‘tgan.
Izoh (0)