Швеция ўз ҳудудида НАТО қўшинларини жойлаштиришга рухсат беради, бироқ тинчлик даврида альянснинг доимий ҳарбий базалари ёки ядро қуролларини мамлакатда жойлаштиришга қарши.
НАТОга аъзолик бирор давлатни ўз ҳудудида ядро қуролини жойлаштиришга мажбур қилмайди, деди Швеция ташқи ишлар вазири Тобиас Биллстрём.
“Биз тинчлик даврида ҳудудимизда ядро қуроли мавжуд бўлиши учун ҳеч қандай сабаб кўрмаяпмиз. Бу борада Норвегия ва Дания йўлидан борамиз. Совуқ уруш тугаганидан бери НАТОнинг фақат учта давлати — АҚШ, Англия ва Франция ядро қуролига эга”, — деди у.
Биллстрёмнинг қўшимча қилишича, Швеция НАТОга альянс ядровий қуролларини жойлаштириш бўйича ҳеч қандай шартларсиз қўшилган.
Бир кун аввал, 11 март куни НАТО бош котиби Йенс Столтернберг альянс ядро қуролига эга иттифоқчилар сонини кўпайтириш режаси йўқлигини айтганди. Унинг қўшимча қилишича, НАТО Швецияда янги жанговар бўлинмаларни жойлаштириш ниятида эмас.
Яқинда НАТОга аъзо бўлган Финляндиянинг президенти Александра Стубба ҳам ўз мамлакати учун ядровий тийиб туриш кучига эга бўлиш муҳим эканини айтганди. Россия Ташқи ишлар вазирлиги расмий вакили Мария Захарова, агар Финляндия ҳудудида АҚШ ядро қуроли пайдо бўлса, Европа хавфсизлигига путур етиши ҳақида огоҳлантирганди.
Швеция 7 март куни расман НАТОга қўшилди ва альянснинг 32-аъзоси бўлди. 11 март куни НАТОнинг Брюсселдаги қароргоҳи олдида мамлакат байроғи кўтарилди.
Изоҳ (0)