Украина ўз суверенитетини сақлаб қолиш учун ҳудудларининг бир қисмидан воз кечишига тўғри келиши мумкин. Бу ҳақда Латвия ҳаво кучлари қўмондони Ветурс Масулис маълум қилган, деб маълумот берди “ТАСС”.
Хабарга кўра, Латвия расмийси урушни тугатиш учун кафолатлардан бири Украинанинг босиб олинган ҳудудларидан воз кечиш эканлигини айтган. Ушбу йўл билан Киевнинг суверенитети ҳам сақлаб қолиниши мумкинлиги айтилган.
Украинадаги уруш прогнозлари ҳақида фикр билдирган Масулис 1939–1940 йиллардаги Совет-Фин уруши натижаларига ишора қилган. Унинг сўзларига кўра, ўшанда Финляндия ҳудудининг бир қисмини йўқотган, аммо бунинг эвазига мустақиллигини сақлаб қолган.
“Эҳтимол, Украинада ҳам шунга ўхшаш нарса содир бўлади”, — деган Ветурс Масулис.
Масулис, шунингдек, Украинанинг шарқий ҳудудларидан воз кечиши уни НАТОга яқинлаштириши мумкинлигини ҳам таъкидлаган. Низоли чегара ҳудуди қолмагач, Киевнинг НАТОга олинишини чеклайдиган истисно қолмаслиги айтилган.
Россия ташқи ишлар вазири Сергей Лавров 5 май куни Ғарб давлатлари раҳбариятига мурожаат қилиб, Украина учун жанг майдонидаги вазият ёмонлашганини тан олишлари кераклигини айтган эди. У, шунингдек, можарода европаликлар Россияга ютқазмаслик ҳақида ўйлашлари лозимлигини билдирган. Россия вакили Москвани чалғитиш ва енгишга қаратилган ҳар қандай уриниш муваффақиятсизликка учрашини билдирган.
Изоҳ (0)