Италиянинг Неапол шаҳрида 4,4 магнитудали зилзила содир бўлган эди. Бу дунёнинг энг хавфли вулқонли ҳудудларидан бири бўлган Флегрей майдонлари фаоллашишига олиб келди. Ҳукумат юқори хавф туфайли аҳолини эвакуация қилишни режалаштирмоқда.
Эҳтимолий таҳдидга жавобан Италия фуқаро муҳофазаси вазирлиги миллий сафарбарлик ҳолатини эълон қилди.
Кейинги силкинишлар юз берганда ғафлатда қолмаслик учун барча мумкин бўлган чораларни кўриб чиқяпмиз, деди вазир Нелло Мусумечи.
Вазият кескинлашган тақдирда, кул, тош ва қизиган газ оқимларининг ҳалокатли оқибатларидан қутулиш учун ҳукумат уч кун ичида 500 мингга яқин кишини зудлик билан кўчиришни режалаштирган. Ҳокимият вулқон отилиши белгилари пайдо бўлса, аҳолини олдиндан огоҳлантиради. Эвакуация автобуслар, поездлар, кемалар ва самолётлар орқали амалга оширилади.
Шу билан бирга, Неапол фуқаролик мудофааси департаменти раҳбари Фабио Чичилян эвакуация фақат вулқон зонасида режалаштирилганини айтди.
Ҳозирги фавқулодда вазият вулқон хусусиятига эмас, балки брадисейсмик хусусиятга эга: аслида, бу ер ости силкинишлари билан боғлиқ брадисейсмик хавфдир. Зилзила юз берган тақдирда, вақтинчалик яшаш жойларини ташкил этиш бўйича протоколлар фаоллаштирилади, деди у.
Изоҳ (0)