Исландия пойтахти Рейкявикдан 30 км узоқликда, пойтахтнинг жануби-ғарбидаги Рейкянес яриморолидаги Литли Хрутур тепалиги яқинида вулқон отилиши бошланди.
Мамлакат метеорология маркази маълумотларига кўра, отилиш маҳаллий вақт билан 16:40 да бошланган. Бунгача сўнгги ҳафтада яриморолда мингга яқин зилзила содир бўлган. Улардан баъзиларининг магнитудаси 5,0 дан ошди. Бир неча кун олдин отилиш ҳудудида тупроқнинг кўтарилиши кузатилди.
Айни пайтда лаванинг отилиш баландлиги тахминан 200 метрни ташкил этмоқда. Сейсмологларнинг таъкидлашича, отилиш жойида буғдан иборат парда ҳосил бўлган. Мамлакатнинг бош аэропорти самолётларнинг қўниши ёки жўнашида ҳеч қандай узилишлар йўқлигини маълум қилди.
Исландиянинг яқин тарихидаги энг ҳалокатли вулқон отилиши 2010 йилда содир бўлган. Ўшанда мамлакатнинг жанубий қисмида жойлашган Эйяфьятлаёкюдль вулқони отилиши натижасида юзага келган кул устуни сабабли бутун Европа бўйлаб парвозларни бир неча ҳафтага тўхтатиб қўйганди.
Натижада юз мингдан ортиқ рейс бекор қилиниб, 10 миллиондан ортиқ одамга зарар етганди.
Изоҳ (0)