Италияда 5 июль куни Этна ва Стромболи вулқонлари ҳаракатга келган. Бу ҳақда Рим маҳаллий нашрларига асосланиб, Reuters маълумот берди.
Унда айтилишича, Этна ва ундан кичикроқ бўлган Стромболи тоғларида вулқон кратери ҳаракатга келиши оқибатида Сицилия оролининг катта қисми кул билан қопланган. Кратер атрофига лава отилиши бошланган. Вулқонга яқин ҳудудларда ҳаво сифати ниҳоятда ёмонлашган.
Этна вулқони яқинида жойлашган Катания аэропорти вақтинча ёпилди. Вулқон отилиши ортидан ҳавога кўтарилган қизғиш тутун яқин атрофни тўсиб қўйган. Шимолий Сицилия соҳилидаги Стромболи вулқони отилиши оқибатида эса денгизга катта миқдорда лава оқиб кетган.
“Катания аэропортидаги учиш-қўниш йўлаги вулқон кули тушиши сабабли парвозлар учун ёпилган. Қўниш ҳам, учиш ҳам тўхтатилди”, дейилади аэропорт баёнотида.
Италия фуқаро муҳофазаси вазири Нелло Мусумечи иккала ҳодиса ҳам назорат остида эканини билдирган. Вазият устидан назорат йўқотилган тақдирда аҳолини фавқулодда эвакуация қилиш режалаштирилаётгани хабар берилди.
Сицилия оролида ўт ўчирувчилар сони икки баравар оширилган. Сицилиянинг шарқий қирғоғидаги Катания атрофида кўчалар ва автомобиллар вулқон кулига ботган, аҳоли ва расмийлар шаҳарни тозалаш учун ҳаракат бошлашган.
Изоҳ (0)